സുരേഷ് ഗോപി, ശോഭന, കല്യാണി പ്രിയദര്‍ശന്‍, ദുല്‍ഖര്‍ സല്‍മാന്‍ എന്നിവരെ പ്രധാന കഥാപാത്രങ്ങളാക്കി തയാറാക്കുന്ന 'വരനെ ആവശ്യമുണ്ട്' എന്ന ചിത്രത്തിലെ ആദ്യ ഗാനം പുറത്തിറങ്ങി.
അല്‍ഫോന്‍സ് ജോസഫ് ഈണമിട്ട നവരാത്രി എന്ന ഗാനമാണ് പുറത്തിറങ്ങിയത്. കാര്‍ത്തിക്കും, കെ എസ് ചിത്രയും ചേര്‍ന്നാണ് ഗാനം ആലപിച്ചിരിക്കുന്നത്.
സിനിമയുടെ രസകരമായ ഫസ്റ്റ്ലുക്ക്‌ പോസ്റ്റര്‍ ആരാധകര്‍ ഇരുകയ്യും നീട്ടിയാണ് സ്വീകരിച്ചത്. എന്നാല്‍, അതിന് ശേഷം ചിത്രത്തിന്‍റെ ടീസറിനായി കാത്തിരുന്ന ആരാധകര്‍ക്ക് നിരാശയായിരുന്നു ഫലം.
സിനിമയുടെ പ്രോമോഷനെ ഏറ്റവും കൂടുതല്‍ സ്വാധീനിക്കുന്ന ടീസര്‍ വേണ്ടെന്ന് വച്ച അണിയറ പ്രവര്‍ത്തകര്‍ മറ്റൊരു സര്‍പ്രൈസ് ഒരുക്കുമെന്ന് നേരത്തെ വ്യക്തമാക്കിയിരുന്നു.
ടീസറിനു പകരമായാണ് ചിത്രത്തിലെ ആദ്യ ഗാനം പ്രേക്ഷകര്‍ക്കായി അണിയറ പ്രവര്‍ത്തകര്‍ പങ്കുവച്ചിരിക്കുന്നത്.
ടീസറില്ലാതെയാണ് ആദ്യ ഗാനമെത്തിയതെങ്കിലും വരും ദിവസങ്ങളില്‍ ടീസറും ട്രെയിലറും പുറത്തിറക്കും എന്ന പ്രതീക്ഷയിലാണ് ആരാധകര്‍.
2005ല്‍ പുറത്തിറങ്ങിയ മകള്‍ക്ക് എന്ന ചിത്രത്തിന് ശേഷം സുരേഷ് ഗോപിയും ശോഭനയും ഒന്നിക്കുന്ന ചിത്രമാണിത്.
സത്യന്‍ അന്തിക്കാടിന്‍റെ മകന്‍ അനൂപ് സത്യന്‍ നവാഗത സംവിധായകനാകുന്നു എന്ന പ്രത്യേകതയും ചിത്രത്തിനുണ്ട്. ഫെബ്രുവരി ഒന്‍പതിനാണ് റിലീസ്.
ദുല്‍ഖറിന്‍റെ പ്രൊഡക്ഷന്‍ ഹൗസായ വേഫെയര്‍ ഫിലിംസാണ് ചിത്രം നിര്‍മ്മിച്ചിരിക്കുന്നത്.
മേജര്‍ രവിയും ചിത്രത്തില്‍ പ്രധാന വേഷത്തില്‍ എത്തുന്നുണ്ട്.
മേജര്‍ ഉണ്ണികൃഷ്ണന്‍ എന്ന കഥാപാത്രമായി സുരേഷ് ഗോപി എത്തുമ്പോള്‍ മേജര്‍ ആത്മാറാമായി മേജര്‍ രവി വേഷമിടും.
