സതാംപ്ടണ്‍: ലോകകപ്പില്‍ ഇന്ന് ഇന്ത്യ അഫ്ഗാനെ നേരിടും. സതാംപ്‍ടണിൽ വൈകിട്ട് 3 നാണ് മത്സരം.
ഭുവനേശ്വർ കുമാറിന്‍റെയും വിജയ് ശങ്കറിന്‍റെയും പരിക്ക് അലട്ടുന്നുണ്ടെങ്കിലും തോൽവി അറിയാതെ മുന്നേറുന്ന ഇന്ത്യ സമ്മർദ്ദമില്ലാതെയാകും ഇന്നിറങ്ങുക.
പരുക്കേറ്റ് മടങ്ങിയ ശിഖർ ധവാന് പകരം ഇന്ത്യൻ ടീമിലിടം പിടിച്ച ഋഷഭ് പന്ത് ഇന്ന് അന്തിമ ഇലവണിൽ സ്ഥാനം പിടിച്ചേക്കും. പരിശീലനത്തിനിടയിൽ പരിക്കേറ്റ വിജയ് ശങ്കറിനെ ഇന്നത്തെ മത്സരത്തിൽ കളിപ്പിച്ചേക്കില്ല.
എന്നാൽ, കാലിനേറ്റ പരുക്ക് സാരമുള്ളതല്ലെന്നും കളിക്കാനാകുമെന്നാണ് പ്രതീക്ഷയെന്നും വിജയ് ശങ്കർ വ്യക്തമാക്കിയിട്ടുണ്ട്. പരിശീലനം പുനരാരംഭിച്ചുവെങ്കിലും ഭുവനേശ്വർ കുമാർ ഇന്ന് ടീമിലുണ്ടാകില്ല. പകരം മുഹമ്മദ് ഷമിയാകും ടീമിലെത്തുക.
ഇതിനിടയില്‍ ഇന്ന് നടക്കുന്ന മത്സരത്തില്‍ മഴ ശല്യം ചെയ്യില്ലയെന്ന് കാലാവസ്ഥാ കേന്ദ്രം അറിയിച്ചു. നേരത്തെ നോട്ടിംഗ്ഹാമില്‍ നടക്കേണ്ടിയിരുന്ന ഇന്ത്യ- ന്യൂസിലന്‍ഡ് മത്സരം മഴ മുടക്കിയിരുന്നു.
