Petrol-Diesel Price: देशात पेट्रोल, डिझेल आणखी स्वस्त होणार! कारण...

केंद्र सरकारने पेट्रोल आणि डिझेलवरील उत्पादन शुल्क कमी केल्यानंतर दर कपात झाली होती. आता आणखी एक आनंदाची बातमी समोर येत आहे. आगामी काळात पेट्रोल आणि डिझेलचे दर आणखी कमी होण्याची शक्यता आहे. कच्च्या तेलाच्या सतत वाढणाऱ्या किमती कमी करण्यासाठी ओपेक प्लस देशांनी मोठा निर्णय घेतला आहे. कच्चे तेल प्रति बॅरल 112-118 डॉलर्सच्या श्रेणीत आहे. गेल्या चार महिन्यांत क्रूडच्या किमतीने नवा उच्चांक गाठला आहे. तेलाच्या वाढत्या किमतीमुळे महागाईचा आलेख वाढत आहे. पण आता ओपेक प्लस देशांनी किमती कमी करण्याचा निर्णय घेतला आहे. तेल निर्यात करणाऱ्या देशांची संघटना आणि रशियासह इतर सहयोगी देशांनी जुलै-ऑगस्टपासून कच्च्या तेलाचे उत्पादन वाढवण्याचा निर्णय घेतला आहे. या निर्णयामुळे क्रुडच्या किमती खाली येण्याची शक्यता आहे. ओपेक प्लस देशांनी जुलै-ऑगस्टमध्ये 6.48 लाख बॅरल क्रूड उत्पादन करण्याचा निर्णय घेतला आहे.

ओपेक प्लस देशांच्या या निर्णयामुळे पेट्रोल आणि डिझेलचे दर कमी होण्याची शक्यता आहे. यामुळे वाढत्या महागाईने त्रस्त झालेल्या जगाच्या अर्थव्यवस्थेला काहीसा दिलासा मिळू शकतो. 2020 मध्ये, कोरोना महामारीच्या वेळी लॉकडाऊनमुळे कच्च्या तेलाच्या वापरात घट झाली होती. त्यामुळे कच्च्या तेलाच्या किंमतीही घसरल्या होत्या. त्यावेळी ओपेक प्लस देशांनी किंमत स्थिर ठेवण्यासाठी कच्च्या तेलाच्या उत्पादनात कपात केली होती.

सध्या ओपेक प्लस देश दररोज 4.32 लाख बॅरल क्रूडचे उत्पादन करत आहेत. पुढील महिन्यापासून उत्पादन 2.16 लाख बॅरलने वाढवून 6.48 लाख बॅरल प्रतिदिन करण्याची योजना आहे. अमेरिकेत पेट्रोलच्या दराने विक्रमी उच्चांक गाठल्यानंतर हा निर्णय घेण्यात आला आहे. 2022 च्या सुरुवातीपासून अमेरिकेत कच्चे तेल 54 टक्के महाग झाले आहे. ओपेक देशांच्या निर्णयानंतर न्यूयॉर्कमध्ये क्रूडची किंमत 0.9% ने घसरून $114.26 प्रति बॅरल झाली. कच्च्या तेलाच्या उत्पादनात वाढ झाल्यास निश्चितच दिलासा मिळणार आहे. यासोबतच महागाईही कमी होण्याची अपेक्षा आहे.