राज ठाकरे यांना आज मिळणार उत्तर?

www.24taas.com, नाशिक

नाशिकमध्ये कालच्या सभेत राज ठाकरेंनी भुजबळांवर जोरदार हल्ला चढवला होता. त्यामुळं घायाळ भुजबळ आज नाशिकमध्ये प्रचारसभा घेणार आहेत. या सभेत भुजबळ राज यांचा हिशोब चुकता करणार यात शंका नाही. त्यामुळं छगन भुजबळ काय बोलणार याबाबत सर्वांनाच उत्सुकता लागली आहे.

राज ठाकरेंनी भुजबळांवर बेधडक टीका केल्यामुळं शिवसेना भाजप चांगलेच सुखावले आहेत. विशेष म्हणजे राज यांच्या आरोपांचीच शहरात चर्चा असून भुजबळ त्यांना आज प्रत्युत्तर देणार आहेत. नाशिकमध्ये आज चार सभांचं आयोजन करण्यात आलं असून माणिकराव ठाकरे आणि नारायण राणेंच्याही तोफा धडाडणार आहेत.

भुजबळांवर काय केली होती टीका राज ठाकरेंनी?

काय करतायेत भुजबळ? नाशिककडे लक्ष आहे का त्याचं? असा प्रश्न विचारूनच राज ठाकरे यांनी भुजबळांना टार्गेट केले. ‘मी तुमचं सरंक्षण करणार नाही असंच भुजबळाचं वागणं आहे’, अश्या प्रकारची उपहासात्मक टीका देखील केली, तर ‘भुजबळ हे तेलगी प्रकरणात अडकले होते’, आणि रातोरात परदेशी पळाले’, असा गंभीर आरोप देखील केले. ‘माझे पुतण्या खासदार कसा होईल, माझा मुलगा आमदार कसा होईल हेच यांनी आयुष्यभर पाहिलं’, असं म्हणतं राज ठाकरे यांनी भुजबळ यांच्या घराणेशाहीवर टीका केली.

तसचं राष्ट्रवादी पक्षात भुजबळांना कसे वागवले जाते हे सांगण्यासाठी ‘ते गृहमंत्री होते पण काढून टाकलं’, असा टोला देखील त्यांना हाणला. पण राज ठाकरे यांनी आज भुजबळांवर फारचं गंभीर आरोप केले. ‘छगन भुजबळांचे पोलीस कमिशनरांना फोन जातात, तडीपारी रद्द करा’, असे आरोप करून राज ठाकरे यांनी खळबळ माजवली.

आता नाशिकमध्ये भुजबळांवर केलेली टीका याला भुजबळ होम पिचवर कसं उत्तर देतात? हे पाहणं नक्कीच उत्सुकतेचं ठरणार आहे.