आईने मोबाईलवर गाणे ऐकू न दिल्याने तरूणीची आत्महत्या

पिंपरी चिंचवड : एका २० वर्षीय तरुणीने नदीत उडी घेऊन आत्महत्या केल्याची घटना पिंपरी मधील काळेवाडी येथे घडली आहे. आईने मोबाइलवर गाणे ऐकण्यास मनाई केल्याने तरूणीने आत्महत्या केली आहे. 

मृगनयनी प्रकाश पाचपिंडे ही ताथवडे येथील इंदिरा महाविद्यालयात बीसीए अभ्यासक्रमाच्या पहिल्या वर्षात शिकत होती. तिचे वडील सेंट्रिंगचे काम करतात, तर आई डी. वाय. पाटील रुग्णालयात आया आहे.

या तरूणीच्या हातातील मोबाइल आईने काढून घेत वडिलांकडे दिला. सकाळी मृगनयनी घरात मोबाइलवर गाणे ऐकत असताना आईने तिला गाणे ऐकण्यास मनाई करून कॉलेजला जाण्यास सांगितले. याचा राग येऊन जोतिबा उद्यानाजवळील पवना नदीघाटावरून तिने नदीत उडी घेतली.

परिसरातील दोन तरुणांनी तिला उडी मारताना पाहिले. तिला वाचविण्यासाठी त्यांनी नदीत उडी घेऊन काही वेळात पाण्याबाहेर काढले आणि रुग्णालयात नेले. मात्र, उपचार करण्याची संधी आली नाही. तिला डॉक्टरांनी मृत घोषित केले.