नवरदेवाला घेऊन घोडा पळाला... आणि मग...

अहमदनगर : घोड्यावरुन वरात काढण्याची हौस अहमदनगरच्या एका नवऱ्याच्या चांगलीच अंगाशी आली. अहमदनगर जिल्ह्यातल्या श्रीगोंदा तालुक्यातल्या घारगावमधली ही घटना आहे.

लग्नात नवरदेवाची घोड्यावरुन वरात काढण्यात आली. बँड आणि डीजेच्या तालावर नवरदेवासह घोड्यालाही नाचवलं जात होतं.

 घोड्याचा हा नाच पाहायला मोठी गर्दीही झाली होती. मात्र बँडच्या आवाजानं घोडा बिथरला आणि नाचवणा-याला हिसका देत घोड्याने नवरदेवासह धूम ठोकली.

तब्बल एक ते दीड किलोमीटर हा घोडा पळून गेला, इतकंच नाही तर त्यानं नवरदेवालाही खाली पाडलं. यामध्ये नवरदेव किरकोळ जखमी झाला. त्यामुळे बोहल्यावर चढण्याआधीच नवरदेवाला हॉस्पिटलमध्ये न्यावं लागलं