अकोला गोयंका डेंटल विद्यार्थ्यांना अखेर न्याय

www.24taas.com, झी मीडिया, मुंबई
अकोल्यातील जमनालाल गोयंका डेंटल कॉलेज अँण्ड हॉस्पिटल या महाविद्यालयातील विद्यार्थ्यांना अखेर न्याय मिळाला आहे. याबाबत झी २४ तासने आवाज उठवला होता. विद्यार्थ्यांच्या प्रश्नांना वाचा फोडण्यासाठी झी २४ तासने प्रकरण लावून धरले होते.
गोयंका डेंटल कॉलेजमध्ये २०११-२०१२ या शैक्षणिक वर्षी प्रवेश घेतलेल्या ४० विद्यार्थ्यांची महाराष्ट्र आरोग्य विद्यापीठांशी संग्लन असलेल्या अन्य खासगी दंत महाविद्यालयात बदली करण्याचे आदेश शासनाने दिले आहेत. गोयंका डेंटल कॉलेजला मान्यता नसल्याने ४० विद्यार्थ्यांचे भवितव्य टांगणीला लागले होते. तर खुद्द न्याय मागण्यासाठी गेलेल्या विद्यार्थ्यांना शिक्षणमंत्री विजयकुमार गावित यांनी लाखोली वाहून विद्यार्थ्यांना बाहेरचा रस्ता दाखविला होता.
अजित पवारांनी असभ्य भाषेत शेतकऱ्यांची चेष्टा केल्याचं प्रकरण ताजं असतानाच आता राष्ट्रवादीचेच नेते आणि वैद्यकीय शिक्षणमंत्री विजयकुमार गावित यांनी मेडिकलच्या विद्यार्थ्यांना शिवीगाळ केल्याचा धक्कादायक प्रकार उघडकीस आला. याबाबतचे फुटेच झी २४ तासने दाखविले होते. तसंच विद्यार्थ्यांचे काय म्हणणे होते, याला वाचा फोडली.