Ind vs SL 1st ODI Highlights and Super Over Rules: టీ20 సిరీస్‌ గెలిచి ఊపుమీద ఉన్న భారత్‌కు తొలి వన్డేలో శ్రీలంక నుంచి గట్టి పోటీ ఎదురైంది. చివరి వరకు ఉత్కంఠగా సాగిన మ్యాచ్‌ను శ్రీలంక అద్భుతంగా పోరాడి టైగా మార్చేసింది. మొదట బ్యాటింగ్ చేసిన శ్రీలంక నిర్ణీత 50 ఓవర్లలో 8 వికెట్ల నష్టానికి 230 పరుగులు చేసింది. అనంతరం బ్యాటింగ్‌కు దిగిన భారత్.. అంతేస్కోరుకు ఆలౌట్ అయింది. కెప్టెన రోహిత్ శర్మ (58) హాఫ్ సెంచరీతో రాణించగా.. మ్యాచ్ టై అయిన సమయంలో శివమ్ దూబే (25) ఔట్ అవ్వడం, ఆ తరువాతి బంతికే అర్ష్‌దీప్ సింగ్ (0) డకౌట్ కావడంతో మ్యాచ్ ఊహించని విధంగా డ్రాగా ముగిసింది.
మ్యాచ్ టైగా ముగియడంతో సూపర్ ఓవర్ నిర్వహిస్తారేమోనని అభిమానులు అనుకున్నారు. ప్రస్తుతం వన్డేల్లో సూపర్ ఓవర్ విధానం లేదు. ఐసీసీ నిబంధనల ప్రకారం టీ20 మ్యాచ్‌ల్లో మాత్రమే సూపర్ ఓవర్ విధానం ఉంటుంది. వన్డే మ్యాచ్‌లకు ఈ నియమాలు లేవు.
టీ20 మ్యాచ్‌ల్లో ఫలితం తేలకపోతే సూపర్ ఓవర్లను ప్రవేశపెడతారు. అయితే ప్రస్తుతం వన్డేల్లో అలాంటి నిబంధన లేదు. టెస్టులు, వన్డేలు, టీ20లకు డిఫరెంట్ రూల్స్ ఉన్నాయి. వన్డేల్లో ఇప్పటివరకు మూడు మ్యాచ్‌ల్లో మాత్రమే సూపర్ ఓవర్ నిర్వహించారు.
2019 వన్డే ప్రపంచకప్ ఫైనల్లో ఇంగ్లాండ్, న్యూజిలాండ్ మధ్య సూపర్ ఓవర్ జరిగింది. అయితే అది కూడా టైగా ముగిసింది. బౌండరీల ఆధారంగా విజేతను ప్రకటించారు. ఆ తరువాత జింబాబ్వే-పాకిస్థాన్‌ల మధ్య 2020 వన్డే సూపర్ ఓవర్‌లో ముగిసింది.
గతేడాది వెస్టిండీస్, నెదర్లాండ్స్ మధ్య ఐసీసీ ప్రపంచ కప్ క్వాలిఫైయర్ మ్యాచ్ సమయంలో సూపర్ ఓవర్ ద్వారా విజేతను నిర్ణయించారు. 1987లో భారత్, పాకిస్థాన్‌ , 1988లో ఆస్ట్రేలియా, పాకిస్థాన్‌ జట్ల మధ్య జరిగిన మ్యాచ్‌లు టై అవ్వగా.. తక్కువ వికెట్లు కోల్పోయిన జట్టును విజేతగా ప్రకటించారు.
శ్రీలంకతో జరిగిన తొలి వన్డేలో భారత్ 15 బంతుల్లో 1 పరుగు చేయాల్సిన దశలో వరుసగా రెండు వికెట్లు కోల్పోవడంతో మ్యాచ్ టైగా ముగిసింది.
మిగిలిన రెండు వన్డేలు గెలిచిన జట్టు సిరీస్‌ను సొంతం చేసుకుంటుంది. రెండో వన్డే ఆగస్టు 4న జరగనుంది.
