આ સુપરસ્ટારને માત્ર 40 દિવસના શૂટિંગના મળશે 65 કરોડ? જાણો ફિલ્મનું નામ

મુંબઈ: રજનીકાંતના ચાહકો હાલ તેની ફિલ્મ કાલા અને 2.0ની રિલીઝની રાહ જોઈ રહ્યાં છે. લાંબા સમયથી આ બે ફિલ્મો અટકી પડી છે. અહેવાલોને માનીએ તો આ બંને ફિલ્મોની રિલીઝની સાથે સાથે રજનીકાંત ડાઈરેક્ટર કાર્તિક સુભરાજની નવી ફિલ્મને શરૂ કરવાની પણ તૈયારીમાં લાગ્યો છે. કહેવાય છે કે કાર્તિકની નવી ફિલ્મમાં રજનીકાંત ઉપરાંત વિજય સતપથી પણ જોવા મળશે. જે વીલનની ભૂમિકામાં ભજવશે.

જો સિફી ડોટ કોમના એક અહેવાલને માનીએ તો કાર્તિકની આ ફિલ્મ માટે રજનીકાંતને 65 કરોડ રૂપિયા ચૂકવવામાં આવશે. અહીં કોઈ મજાક કરી રહ્યું નથી. અહેવાલમાં જણાવવામાં આવ્યું છે કે રજનીકાંત પોતાની નવી ફિલ્મ માટે માત્ર 40 દિવસ શૂટિંગ કરશે અને 65 રૂપિયા ચાર્જ કરશે. કાર્તિકની આ ફિલ્મ આ વર્ષે મેના અંત સુધીમાં શરૂ થઈ જશે.

જો વાત રજનીકાંતની બિગ બજેટ ફિલ્મ 2.0ની કરીએ તો તે તેના પોસ્ટ પ્રોડક્શનના કારણે અટવાયેલી છે. ફિલ્મના ડાઈરેક્ટર કોશિશ કરી રહ્યાં છે કે તે જલદીથી તેનું સીજીઆઈ વર્ક ખતમ કરે જેથી કરીને દર્શકોએ વધુ રાહ ન જોવી પડે. ફિલ્મની રિલીઝ તારીખને લઈને પણ હજુ કઈ સ્પષ્ટતા નથી. જો કે કેટલાક મીડિયા અહેવાલોમાં દાવો કરવામાં આવી રહ્યો છે કે રજનીકાંતની આ ફિલ્મ આમિર ખાનની ઠગ્સ ઓફ હિન્દોસ્તાન સાથે રિલીઝ થઈ શકે છે. જેના કારણે ભારતીય સિનેમાના બે મોટા સુપરસ્ટાર્સ વચ્ચે જોરદાર ટક્કર જોવા મળશે.

થોડા સમય પહેલા આમિર ખાને બંને ફિલ્મોની ટક્કર પર નિવેદન આપ્યું હતું કે અમે તો ઈચ્છીશું કે 2.0 અને ઠગ્સ ઓફ હિન્દોસ્તાન વચ્ચે ટક્કર ન થાય. તેનાથી બંને ફિલ્મોને મોટુ નુક્સાન થશે. જો કે એ વાતનો હાલ ઈન્કાર કરી શકુ નહીં કે ક્યારેક હાલાત એવા બની જાય છે કે તમે કશું કરી શકતા નથી.