Corona: દેશના 13 રાજ્યોમાં જોવા મળ્યો કોરોનાનો નવો વેરિએન્ટ, કેટલો છે ખતરનાક અને શું ફરી મચાવશે આતંક?

નવી દિલ્હીઃ Coronavirus Cases: દેશમાં ફરી એકવાર કોરોના વાયરસના કેસ વધી રહ્યા છે. છેલ્લા 24 કલાકમાં દેશભરમાં આ રોગચાળાના 7,830 નવા કેસ નોંધાયા છે. આ દરમિયાન 16 લોકોના મોત થયા છે. છેલ્લા 223 દિવસમાં ભારતમાં નોંધાયેલા દૈનિક કેસની આ સૌથી વધુ સંખ્યા છે. અગાઉ, ગયા વર્ષે 1 સપ્ટેમ્બરના રોજ, દેશમાં ચેપના સૌથી વધુ 7,946 દૈનિક કેસ નોંધાયા હતા. આ સમયે, દેશમાં સારવાર હેઠળ દર્દીઓની સંખ્યા વધીને 40,215 થઈ ગઈ છે.

કોરોનાનું નવું સ્વરૂપ આવ્યું
કોરોનાના વધતા જતા કેસોમાં ભયાનક બાબત એ છે કે ઓમિક્રોનના સબ-વેરિઅન્ટ XBB1.16માં પરિવર્તન આવ્યું છે. હવે બીજું સબ-વેરિઅન્ટ XBB1.16.1 સામે આવ્યું છે. આંકડાઓ અનુસાર, XBB1.16.1 દિલ્હી, ગુજરાત અને હરિયાણા સહિત 13 રાજ્યો અને કેન્દ્રશાસિત પ્રદેશોમાં જોવા મળ્યો છે. ભારતીય SARS Cove-2 Genomics Consortium (INSACOG) ના ડેટા અનુસાર, XBB1.16 વેરિઅન્ટના 1,774 કેસ 22 રાજ્યો અને કેન્દ્રશાસિત પ્રદેશોમાં મળી આવ્યા છે.

આ પણ વાંચોઃ દેશના 30 મુખ્યમંત્રીઓમાંથી 29 કરોડપતિ, આ રાજ્યના મુખ્યમંત્રી પાસે સૌથી વધુ સંપત્તિ

ભારતીય સાર્સ કોવ-2 જીનોમિક્સ કન્સોર્ટિયમ એ કેન્દ્રીય આરોગ્ય અને પરિવાર કલ્યાણ મંત્રાલય દ્વારા રચાયેલી વિવિધ રાષ્ટ્રીય પ્રયોગશાળાઓનું જૂથ છે. INSACOG કોરોના વાયરસના જીનોમ સિક્વન્સિંગ અને કોવિડ-19 વાયરસનું વિશ્લેષણ કરી રહ્યું છે. ભારતમાં 80% થી વધુ કેસ આ પ્રકારના છે. ICMR એ આ વેરિઅન્ટને અલગ કરીને પરીક્ષણ કર્યું છે. લેબ અભ્યાસમાં મળેલા પરિણામો અનુસાર, આ પ્રકાર જીવલેણ નથી. જો કે આગામી સમયમાં કોરોનાના કેસ વધી શકે છે. પરંતુ હોસ્પિટલમાં જનારા લોકોની સંખ્યા નહિવત હશે.

નિષ્ણાતો કહે છે કે ભલે હવે ગભરાવાની જરૂર નથી, પરંતુ લોકોએ સતર્ક રહેવું જોઈએ. કોવિડ પ્રોટોકોલનું પાલન કરવું જોઈએ. આ સિવાય, જો તમે હજી સુધી કોવિડ રસીનો બૂસ્ટર ડોઝ લીધો નથી, તો તે પણ લેવો જોઈએ.

આ પણ વાંચોઃ 21 વર્ષની ઉંમરે કેવા દેખાતા હતા ભગવાન રામ? AI એ બનાવી મનમોહક તસવીરો, જોતા જ રહી જશો