ઈવીએમના નવા મોડેલથી થશે 2024ની લોકસભા ચૂંટણી, જાણો શું છે એમ-3 મોડેલની ખાસિયતો

Loksabha Election: 2024માં યોજાનારી લોકસભા ચૂંટણીમાં નવા મોડેલના ઈવીએમનો ઉપયોગ થશે. ચૂંટણી પંચે દેશના તમામ જિલ્લા માટ નવા ઈવીએમની ફાળવણી પણ કરી દીધી છે. નવા ઈવીએમની ખાસિયત એ છે કે તેનાથી એક લોકસભા ક્ષેત્રમાં એક કન્ટ્રોલ યુનિટથી 384 ઉમેદવારો માટે એક સાથે મતદાન કરાવી શકાય છે. તેના કન્ટ્રોલ યુનિટમાં 24 બેલટ યુનિટને જોડી શકાય છે. વર્તમાન ઈવીએમથી એક લોકસભા ક્ષેત્રમાં ફક્ત 64 ઉમેદવારોનું જ એક સાથે મતદાન કરાવી શકાય છે. ચૂંટણી પંચના નિર્દેશ અનુસાર જાહેર ક્ષેત્રની કંપની ભેલ દ્વારા ઈવીએમનું એમ-3 મોડેલ તૈયાર કરવામાં આવ્યું છે.

એમ-3 મોડેલના ઈવીએમની ખાસિયતો
એમ-3 મોડેલનું ઈવીએમ મશીન ઘણી રીતે જૂની મશીનનું અપગ્રેડેડ વર્ઝન છે. તેમાં ખામી સર્જાવાની શક્યતા ઓછી છે. જો આ ઈવીએમની સાથે કોઈ પ્રકારની છેડછાડ કરવામાં આવે તો તે સ્લીપ મોડમાં જતું રહેશે. તેની ચિપને એક જ વાર પ્રોગ્રામ કરી શકાય છે. આ ઈવીએમને ઈન્ટરનેટ કે અન્ય કોઈ નેટવર્કથી કન્ટ્રોલ નથી કરી શકાતું. તેમાં રિયલ ટાઈમ  ક્લોક અને ડાયનામિક કોડિંગ જેવી સુવિધાઓ છે.

નવા ઈવીએમની બેટરી 50 ટકા હોય તો પણ તેનાથી દિવસભર મતદાન કરાવી શકાય છે. તેની એક મોટી ખાસિયત એ પણ છે કે મતદાન પહેલા જ્યારે કન્ટ્રોલ યુનિટથી બેલટ યુનિટ અને વીવીપેટને જોડવામાં આવશે, ત્યારે કન્ટ્રોલ યુનિટ પહેલા જાતે જ પોતાની તપાસ કરશે. ત્યારબાદ બેલટ યુનિટની અને વીવીપેટની તપાસ કર્યા બાદ મશીન મતદાન માટે તૈયાર થઈ જશે.

2019ની લોકસભા ચૂંટણીમાં તેલંગણાની નિઝામાબાદ બેઠક એ સમયે ચર્ચામાં હતી, જ્યારે અહીં ચૂંટણઈના મેદાનમાં 185 ઉમેદવારો હતા. સત્તાધારી પક્ષ ટીઆરએસના વડા ચંદ્રશેખર રાવની પુત્રી કવિતાએ પણ આ જ બેઠક પરથી ચૂંટણી પડી હતી. આ બેઠક પર મતદાન કરાવવા 26 હજાર ઈવીએમની જરૂર પડી હતી.