નાનપણમાં ખરીદેલાં 3 શેર બન્યા પારસ પથ્થર! શેરબજારના આ જાદુગરને બિલ ગેટ્સ પણ માને છે ગુરુ

Warren Buffet Success Story: વોરેન બફેટે માત્ર 12 વર્ષની ઉંમરે શેરબજારમાં રોકાણ કરવાનું શરૂ કર્યું હતું. જાણો કેવી રીતે તેની મહેનત અને બુદ્ધિથી તેમણે બર્કશાયર હેથવે જેવી કંપની બનાવી અને વિશ્વના સૌથી ધનિક લોકોમાં પોતાનું સ્થાન બનાવ્યું. આજે પણ બફેટ એક નોર્મલ લાઈફ જીવી રહ્યાં છે. શું તમે ક્યારેય વિચાર્યું છે કે રમવાની ઉંમરે વ્યક્તિનો ગોલ ફાયનલ હોય કે મારે દુનિયામાં આ જ કરવું છે જેને દુનિયા ક્યારેય ભૂલી ના શકે? બર્કશાયર હેથવેના માલિક અને અનુભવી રોકાણકાર વોરેન એડવર્ડ બફેટ (Warren Edward Buffett) એ વ્યક્તિ છે જેમણે માત્ર 12 વર્ષની ઉંમરે શેર્સમાં રોકાણ કરવાનું શરૂ કર્યું હતું. ખાસ વાત એ છે કે આ નાની ઉંમરમાં તેમણે ખરીદેલા શેરોએ તેમને નફો તો અપાવ્યો જ પરંતુ તેમને ઈન્વેસ્ટમેન્ટની દુનિયામાં આવવાની પ્રેરણા પણ આપી.

વોરેન બફેટ નાનપણથી જ માર્કેટ જોતા જ મોટા થયા હતા:
વોરેન બફેને શેરબજારના જાદુગર કહેવાય છે. અમેરિકાના નેબ્રાસ્કામાં 30 ઓગસ્ટ, 1930ના રોજ જન્મેલા વોરેન બફેટ વિશ્વના સૌથી ધનિક રોકાણકારોમાં સામેલ છે. વોરન બફેટના પિતા સ્ટોક બ્રોકર હતા, જેના કારણે વોરેન બફેટ શેરબજાર જોઈને મોટા થયા હતા. ધીરે ધીરે તેમનો રસ પણ આ ક્ષેત્રમાં દેખાવા લાગ્યો.

12 વર્ષની ઉંમરે આ કંપનીના 3 શેર ખરીદ્યા:
વોરેન બફે જ્યારે 12 વર્ષના હતા ત્યારે તેમણે 1942માં અમેરિકન પેટ્રોલિયમ કંપની સિટીઝ સર્વિસના 3 શેર ખરીદ્યા હતા. લગભગ 4 મહિના પછી તેમણે આ શેર્સમાંથી $5 નો નફો કર્યો. આ પછી વોરેનનો શેરબજારમાં રસ વધુ વધ્યો. જે કંપનીમાં બફેએ હાથ નાખ્યો એ કંપનીની કાયાપલટ થઈ ગઈ છે. 

14 વર્ષની ઉંમરે શેર માર્કેટમાંથી 225 ડોલરની કમાણી કરી:
વોરન બફેટે 1944માં શેરબજારમાં નાણાંનું રોકાણ કરીને લગભગ $225નો નફો મેળવ્યો હતો. આ પછી તેમણે ક્યારેય પાછું વળીને જોયું નથી. જો કે, તે સમયે કોઈને ખબર નહોતી કે આ 14 વર્ષનો છોકરો એક દિવસ આખી દુનિયા પર રાજ કરશે. તમને જણાવી દઈએ કે ફોર્બ્સ દ્વારા 2008માં બહાર પાડવામાં આવેલી અમીરોની યાદીમાં વોરેન બફે વિશ્વના સૌથી અમીર વ્યક્તિ બન્યા હતા.

બર્કશાયર હેથવેનો પાયો 1965માં નાખ્યો:
વિશ્વના સૌથી સફળ રોકાણકારો પૈકીના એક વોરેન બફેટ બર્કશાયર હેથવેના ચેરમેન અને સીઈઓ છે. આ કંપનીની સ્થાપના 1839 માં કાપડ ઉત્પાદક કંપની તરીકે કરવામાં આવી હતી. 1956માં વોરેને 'બફેટ પાર્ટનરશિપ લિમિટેડ'ની સ્થાપના કરી. બાદમાં તેમણે તેમના મિત્ર ચાર્લી મુંગેર સાથે મળીને 1965માં ટેક્સટાઇલ મેન્યુફેક્ચરિંગ કંપની બર્કશાયર હેથવે હસ્તગત કરી.

વોરેન બફેટની કંપનીનો શેર વિશ્વમાં સૌથી મોંઘો:
બર્કશાયર હેથવે S&P 500 ઇન્ડેક્સની ટોચની 10 કંપનીઓમાંની એક છે. વિશ્વની કોઈપણ જાહેર કંપનીની સરખામણીમાં તેના શેરની કિંમત $4,59,800 સૌથી વધુ છે. આ સ્ટૉકની 52 સપ્તાહની ઊંચી સપાટી $6,47,039 છે. કંપનીનું બોર્ડ હંમેશા શેરના વિભાજનની વિરુદ્ધ રહ્યું છે. આ જ કારણ છે કે તે વિશ્વનો સૌથી મોંઘો સ્ટોક છે.

વોરન બફે 56 વર્ષની ઉંમરે અબજોપતિ બની ગયા:
તમને જણાવી દઈએ કે વોરન બફેટ 56 વર્ષની ઉંમરે એટલે કે 1986માં અબજોપતિ બન્યા હતા. એવું કહેવાય છે કે તેમણે 50 વર્ષની ઉંમર પછી 99 ટકા સંપત્તિ મેળવી છે.  આજના યુગમાં વિશ્વભરના શેરબજારોની હિલચાલને નિયંત્રિત કરનાર વ્યક્તિ વોરન બફે છે. અનુભવી રોકાણકારો પૈસા કમાવવા માટે માત્ર ચક્રવૃદ્ધિની ગણતરીઓ અપનાવે છે. તેમનું માનવું છે કે જ્યારે દરેક રોકાણ કરી રહ્યું છે અને બજાર ઝડપથી વધી રહ્યું હોય ત્યારે બજારથી દૂર રહો. પાનખરમાં જ્યારે લોકો ઉતાવળમાં શેર વેચી રહ્યાં હોય ત્યારે રોકાણની તકો શોધો.

વોરન બફે 84 લાખ કરોડ રૂપિયાની ફર્મના માલિક:
તમને જણાવી દઈએ કે 28 ઓગસ્ટ 2024ના રોજ વોરેન બફેટની કંપની બર્કશાયર હેથવેનું માર્કેટ કેપ 1 ટ્રિલિયન ડોલર એટલે કે 84 લાખ કરોડ રૂપિયાને પાર કરી ગયું હતું. આજે, તેમની પાસે NVIDIA થી લઈને Apple, Coca-Cola, Moody's, The Vanguard Group, BlackRock, State Street Corporation, Geode Capital Management, Morgan Stanley, Northern Trust, BNY Mellon અને Norges Bank જેવી વિશ્વની સૌથી મોટી કંપનીમાં ભાગીદારી છે. તમને જણાવી દઈએ કે થોડા દિવસો પહેલા તેમણે આઈફોન નિર્માતા એપલમાં પોતાનો 50% હિસ્સો વેચી દીધો છે.