ಸರಿಗಮಪ ವೇದಿಕೆಯಲ್ಲಿ ಅನಿಲ್ ಕುಂಬ್ಳೆ, ವಿಶೇಷ ಬಯಕೆ ವ್ಯಕ್ತಪಡಿಸಿದ ಕಿಚ್ಚ ಸುದೀಪ್.!

Anil Kumble in SRGMP: ಅನಿಲ್ ಕುಂಬ್ಳೆ ಸರಿಗಮಪ ಕಾರ್ಯಕ್ರಮಕ್ಕೆ ಬಂದಿದ್ದಕ್ಕೆ ನಟ ಸುದೀಪ್ ಕೂಡ ಸಂಭ್ರಮಿಸಿದ್ದಾರೆ.

ನಟ ಕಿಚ್ಚ ಸುದೀಪ್

ಜೀ ಕನ್ನಡದ (Zee Kannada) ಸರಿಗಮಪ ಶೋನಲ್ಲಿ ಈ ವಾರದ ಅತಿಥಿಯಾಗಿ ಕ್ರಿಕೆಟ್ ದಿಗ್ಗಜ ಅನಿಲ್ ಕುಂಬ್ಳೆ ಆಗಮಿಸಿದ್ದಾರೆ. ಸ್ಪಿನ್​ ಮಾಂತ್ರಿಕ ಅನಿಲ್​ ಕುಂಬ್ಳೆ (Anil Kumble) ಆಗಮನದಿಂದ ಕಾರ್ಯಕ್ರಮಕ್ಕೆ ಹೊಸ ಮೆರುಗು ಬಂದಿದೆ. ಅನಿಲ್ ಕುಂಬ್ಳೆ ಸರಿಗಮಪ ಕಾರ್ಯಕ್ರಮಕ್ಕೆ ಬಂದಿದ್ದಕ್ಕೆ ನಟ ಸುದೀಪ್ ಕೂಡ ಸಂಭ್ರಮಿಸಿದ್ದಾರೆ.

ಜೀ ಕನ್ನಡ ವಾಹಿನಿಯು ಈ ವಿಶೇಷ ಎಪಿಸೋಡ್​ನ ಪ್ರೋಮೋ ಹಂಚಿಕೊಂಡಿದ್ದು, ವೀಕ್ಷಕರಲ್ಲಿ ಸಖತ್ ನಿರೀಕ್ಷೆ ಮೂಡಿದೆ. ಶನಿವಾರ ಮತ್ತು ಭಾನುವಾರ ರಾತ್ರಿ 7.30ರಿಂದ 10.30ರವರೆಗೆ ಈ ಎಪಿಸೋಡ್​ ಪ್ರಸಾರವಾಗಲಿದೆ. ಇದಕ್ಕಾಗಿ ಸಂಗೀತ ಪ್ರಿಯರು ಮಾತ್ರವಲ್ಲ, ಕ್ರೀಡಾಭಿಮಾನಿಗಳು ಸಹ ಕಾತುರರಾಗಿದ್ದಾರೆ.

ಸುದೀಪ್​ ಸ್ಪೆಷಲ್​ ವಿಡಿಯೋ:

ಅನಿಲ್ ಕುಂಬ್ಳೆ ಎಪಿಸೋಡ್‌ಗೆ ಕಿಚ್ಚ ಸುದೀಪ್​ (Kiccha Sudeep) ಸ್ಪೆಷಲ್​ ವಿಡಿಯೋ ಒಂದನ್ನು ಕಳುಹಿಸಿಕೊಟ್ಟಿದ್ದಾರೆ. "ಅನಿಲ್ ಕುಂಬ್ಳೆ ಬೌಲಿಂಗ್ ಮಾಡಬೇಕು, ನಾನು ಕೀಪಿಂಗ್ ಮಾಡಬೇಕು ಎಂಬ ದೊಡ್ಡ ಆಸೆ ಇತ್ತು" ಎಂದು ಹೇಳಿಕೊಂಡಿದ್ದಾರೆ.  

ಇನ್ನೊಂದು ಆಸೆ ವ್ಯಕ್ತಪಡಿಸಿದ ಪ್ರೇಕ್ಷಕರು:

'ವೀಕೆಂಡ್ ವಿಥ್ ರಮೇಶ್' ಕಾರ್ಯಕ್ರಮದ ಸಾಧಕರ ಸೀಟ್‌ನಲ್ಲಿ ಅನಿಲ್ ಕುಂಬ್ಳೆ ಅವರನ್ನು ನೋಡಬೇಕು ಎಂಬುದು ಎಲ್ಲ ಅಭಿಮಾನಿಗಳು ಬಯಕೆಯಾಗಿದೆ. ಈ ಬಗ್ಗೆ ಹಲವರು ಜೀ ಕನ್ನಡ ಹಂಚಿಕೊಂಡ ಈ ಪ್ರೊಮೊಗೆ ಕಾಮೆಂಟ್ ಮಾಡಿದ್ದಾರೆ. ಮೊದಲನೇ ಸೀಸನ್ ಶುರುವಾದಾಗಿನಿಂದಲೂ ಈ ಆಸೆಯನ್ನು ಪ್ರೇಕ್ಷಕರು ವ್ಯಕ್ತಪಡಿಸುತ್ತಲೇ ಇದ್ದಾರೆ. ಆದರೆ ಈವರೆಗೆ ಅದು ನೆರವೇರಿಲ್ಲ. ಮುಂಬರುವ ಸೀಸನ್‌ನಲ್ಲಾದರೂ ಸಾಧಕರ ಸೀಟ್‌ನಲ್ಲಿ ಕುಳಿತುಕೊಳ್ಳಬಹುದು ಎಂದು ಅಭಿಮಾನಿಗಳು ನಿರೀಕ್ಷಿಸಿದ್ದಾರೆ. ಈ ಬಾರಿಯಾದರೂ ಅನಿಲ್​ ಕುಂಬ್ಳೆ ಅವರನ್ನು ಕರೆಸಿ ಎಂದು ಕ್ರಿಕೆಟ್​ ಫ್ಯಾನ್ಸ್​ ಮನವಿ ಮಾಡಿಕೊಳ್ಳುತ್ತಿದ್ದಾರೆ.