ഏറെ നാളുകളുടെ കാത്തിരിപ്പിന് ശേഷമാണ് പൃഥ്വിരാജിനെയും നയൻതാരയെയും കേന്ദ്ര കഥാപാത്രങ്ങളാക്കി അൽഫോൺസ് പുത്രൻ ഒരുക്കിയ ഗോൾഡ് സിനിമയുടെ റിലീസ് പ്രഖ്യാപിക്കുന്നത്. ഈ കഴിഞ്ഞ ഓണത്തിന് അൽഫോൺസ് പുത്രൻ ചിത്രം തീയറ്ററുകളിൽ എത്തുമെന്ന് അറിയിച്ചിരുന്നെങ്കിലും ചില സാങ്കേതിക പ്രശ്നങ്ങളും പോസ്റ്റ് പ്രൊഡക്ഷൻ ജോലികൾ പൂർത്തിയാകാത്തതിനെയും തുടർന്ന് ഗോൾഡിന്റെ റിലീസ് നീണ്ട് പോകുകയായിരുന്നു. ചിത്രത്തിന്റെ റിലീസിനെ കുറിച്ച് നിർമാതാക്കളിൽ ഒരാളായ ലിസ്റ്റിൻ സ്റ്റീഫനോട് മാധ്യമ പ്രവർത്തകർ ചോദിക്കുമ്പോൾ കൃത്യമായ ഉത്തരം ലഭിച്ചിരുന്നില്ല. തുടർന്ന് കഴിഞ്ഞ ദിവസമാണ് ലിസ്റ്റിൻ സ്റ്റീഫൻ ഗോൾഡ് ഡിസംബർ ഒന്നിന് തിയറ്ററുകളിൽ എത്തുമെന്ന് തന്റെ സോഷ്യൽ മീഡിയ പേജിലൂടെ അറിയിച്ചത്.
അതേസമയം ചിത്രത്തിന്റെ റിലീസ് ചിലപ്പോൾ നീണ്ട് പോകാൻ സാധ്യതയുണ്ടെന്ന് ഒരു ചെറിയ മുന്നറിയിപ്പും നൽകിയാണ് ലിസ്റ്റിൻ ഗോൾഡ് തീയറ്ററുകളിൽ എത്തുന്ന ദിവസമേതാണെന്ന് പ്രഖ്യാപിക്കുന്നത്. പൃഥ്വിരാജ് പ്രൊഡക്ഷൻസിന്റെ സഹബാനറിൽ സുപ്രിയ മേനോനോടൊപ്പം ചേർന്നാണ് ലിസ്റ്റിൻ ഗോൾഡ് നിർമിച്ചിരിക്കുന്നത്. എന്നാൽ ചിത്രത്തെ കുറിച്ചുള്ള ഈ സുപ്രധാന വിവരം നായകനായ പൃഥ്വിരാജ് ഇതുവരെ തന്റെ ഒരു സോഷ്യൽ മീഡിയ പേജിൽ പോലും പങ്കുവച്ചിട്ടില്ല. കൂടാതെ നടന്റെ തന്നെ പ്രൊഡക്ഷൻ കമ്പനി നിർമിക്കുന്ന ചിത്രത്തെ കുറിച്ച് പൃഥ്വിരാജ് പ്രൊഡക്ഷൻസ് ഒരു വാക്ക് പോലും ഇതുവരെ പറഞ്ഞിട്ടില്ല.
നേരത്തെ പല അഭിമുഖങ്ങളിലും വാർത്ത സമ്മേളനങ്ങളിലും ഗോൾഡിനെ കുറിച്ച് ചോദിക്കുമ്പോൾ 'ഒരു അൽഫോൺസ് പുത്രൻ ചിത്രം' എന്ന് മാത്രമായിരുന്ന പൃഥ്വി പ്രതികരിച്ചിരുന്നത്. എന്നാൽ ഇപ്പോൾ സിനിമയെ കുറിച്ച് ഒരു വാക്ക് പോലും താരം സംസാരിക്കാനോ അതിനെ കുറിച്ച് വിവരങ്ങൾ പങ്കുവക്കാനോ തയ്യാറാകുന്നില്ല. ഗോൾഡിന്റെ പുതിയ റിലീസ് പ്രഖ്യാപിച്ചതിന് ശേഷം രണ്ട് പോസ്റ്റുകളാണ് പൃഥ്വിരാജ് തന്റെ സോഷ്യൽ മീഡിയ പേജുകളിൽ പങ്കുവച്ചിട്ടുള്ളത്. ഒന്ന് താരം വർക്ക്ഔട്ട് ചെയ്യുന്ന ചിത്രവും രണ്ട് താരത്തിന്റെ ഭാര്യ സുപ്രിയ മേനോൻ വനിത മാസികയുടെ കവർ ഫോട്ടോയിൽ എത്തിയ ചിത്രവുമാണ് പൃഥ്വി ഇതുവരെ പങ്കുവച്ചിട്ടുള്ളത്.
പൃഥ്വിരാജിന്റെ സോഷ്യൽ മീഡിയ ടീമായ പൊഫാക്ടിയോ (POFFACTIO) പോലും ചിത്രത്തിന്റെ യാതൊരു പുതിയ വിവരവും പങ്കുവച്ചിട്ടില്ല. പൃഥ്വിരാജ് മാത്രമല്ല സംവിധായകനായ അൽഫോൺസ് പുത്രനും ചിത്രത്തിന്റെ ഏറ്റവും പുതിയ വിവരം തന്റെ സോഷ്യൽ മീഡിയ പേജിൽ പങ്കുവച്ചിട്ടില്ല. എന്നാൽ സോഷ്യൽ മീഡിയയിൽ സജീവമായിട്ടുള്ള സംവിധായകൻ സിനിമയെ കുറിച്ച് ചില ആരാധകർ ചോദിക്കുന്ന ചോദ്യത്തിന് മറുപടി നൽകുന്നുണ്ട്.
ലിസ്റ്റിൻ സ്റ്റീഫന്റെ മാജിക് ഫ്രേയിംസാണ് ഗോൾഡ് തിയറ്ററുകളിൽ എത്തിക്കുന്നത്. ദി ടീം എന്ന സിനിമ വിതരണ കമ്പനിയാണ് ചിത്രം തമിഴ്നാട്ടിൽ എത്തിക്കുന്നത്. ദി ടീം തന്നെ തങ്ങൾക്ക് കൈയ്യിലുള്ള ചിത്രങ്ങളും വീഡിയോകളും വെച്ച് കൌണ്ട്ഡൌൺ പ്രൊമോഷൻ ആരംഭിച്ചു കഴിഞ്ഞു. അതിസമയം ചിത്രത്തിന്റെ സെൻസറിങ് ഇതുവരെ കഴിഞ്ഞിട്ടില്ല. എന്നാൽ ഗോൾഡിന്റെ ഒടിടി റൈറ്റും സാറ്റ്ലൈറ്റ് അവകാശവും നേരത്തെ തന്നെ വിറ്റു പോയി.
ജോഷി എന്ന കഥാപാത്രത്തെയാണ് പൃഥ്വിരാജ് ഗോൾഡിൽ അവതരിപ്പിക്കുന്നത്. നയൻതാരയെത്തുന്നത് സുമംഗലി ഉണ്ണികൃഷ്ണൻ എന്ന കഥാപാത്രമായിട്ടാണ്. ചിത്രത്തിന്റെ ടീസർ നേരത്തെ പുറത്ത് വിട്ടിരുന്നു. എന്നാൽ ഇനി സിനിമയുടെ ട്രെയിലറോ ഗാനമോ പുറത്ത് റിലീസിന് മുമ്പ് പുറത്ത് വിടില്ലയെന്നാണ് ചില റിപ്പോർട്ടുകളിൽ പറയുന്നത്. പൃഥ്വിരാജിനും നയൻതാരയ്ക്കും പുറമെ ഷമ്മി തിലകൻ, മല്ലിക സുകുമാരൻ, വിനയ് ഫോർട്ട്, അൽതാഫ് സലീം, സാബുമോൻ, ചെമ്പൻ വിനോദ്, ബാബുരാജ്, കൃഷ്ണ ശങ്കർ, ശബരീഷ് വർമ്മ, റോഷൻ മാത്യു, ലാലു അലക്സ്, ജാഫർ ഇടുക്കി, ജഗദീഷ്, അബു സലീം, സുരേഷ് കൃഷ്ണ, ദീപ്തി സതി, സുധീഷ്, അജ്മൽ അമീർ, പ്രേം കുമാർ, സൈജു കുറിപ്പ്, ജസ്റ്റിൻ ജോൺ, ഫയ്സൽ മുഹമ്മദ്, എം ഷിയാസ് തുടങ്ങി വൻ താരനിരയാണ് ചിത്രത്തില്‍ അഭിനയിക്കുന്നത്.
അൽഫോൺസ് പുത്രൻ തന്നെയാണ് ചിത്രത്തിന്റെ കഥ, എഡിറ്റിങ്, സംഘട്ടനം, വിഎഫ്എക്സ്, ആനിമേഷൻ, കളർ ഗ്രേഡിങ് തുടങ്ങിയവ കൈകാര്യം ചെയ്തിരിക്കുന്നത്. ആനന്ദ് സി ചന്ദ്രനാണ് ചിത്രത്തിന്റെ ഛായാഗ്രാഹണം നിര്‍വഹിച്ചിരിക്കുന്നത്. പ്രേമം ഇറങ്ങി ഏഴ് വർഷങ്ങൾക്ക് ശേഷമെത്തുന്ന അൽഫോൺസ് പുത്രൻ ചിത്രമെന്ന പ്രത്യേകതയും ഗോൾഡിനുണ്ട്. അൽഫോൺസിന്റെ കരിയറിലെ മൂന്നാമത്തെ ചിത്രമാണ് ഗോൾഡ്. നിവിൻ പോളിയെ നായകനാക്കി ഒരുക്കിയ നേരം, പ്രേമം എന്നിവയായിരുന്നു അൽഫോൺസിന്റെ ആദ്യ രണ്ട് ചിത്രങ്ങൾ.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEEHindustanApp ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...
![Kurukk Movie: ക്രൈം ഇൻവെസ്റ്റിഗേഷൻ സസ്പെൻസ് ത്രില്ലറുമായി "കുരുക്ക്"; മ്യൂസിക്ക് & ട്രെയിലർ ലോഞ്ച് നടന്നു](https://malayalam.cdn.zeenews.com/malayalam/sites/default/files/styles/zm_175x100/public/2024/06/22/274055-kurukk.png?itok=-1qisIGq "Kurukk Movie: ക്രൈം ഇൻവെസ്റ്റിഗേഷൻ സസ്പെൻസ് ത്രില്ലറുമായി "കുരുക്ക്"; മ്യൂസിക്ക് & ട്രെയിലർ ലോഞ്ച് നടന്നു")
