Jai Mahendran: ഒടിടിയിൽ വിജയം കൊയ്യാൻ സൈജു കുറുപ്പ്; സ്ട്രീമിംഗ് ആരംഭിച്ച് 'ജയ് മഹേന്ദ്രൻ'

സൈജു കുറുപ്പ് നായകനായ ഭരതനാട്യം ഒടിടിയിൽ പ്രേക്ഷക പ്രീതി നേടി മുന്നേറുകയാണ്. ചിത്രം തിയറ്ററിൽ വലിയ വിജയം നേടിയില്ലെങ്കിലും ഒടിടിയിൽ വളരെയധികം ശ്രദ്ധ നേടി. ഇപ്പോഴിതാ സൈജു കുറുപ്പ് കേന്ദ്ര കഥാപാത്രത്തെ അവതരിപ്പിക്കുന്ന  ഒരു വെബ് സീരീസും ഒടിടിയിൽ പ്രദർശനം ആരംഭിച്ചിരിക്കുകയാണ്. 'ജയ് മഹേന്ദ്രൻ' എന്ന വെബ് സിരീസ് ആണ് സോണി ലിവിൽ എത്തിയിരിക്കുന്നത്. 

പ്രമുഖ ഒടിടി പ്ലാറ്റ്ഫോമായ സോണി ലിവ് അവതരിപ്പിക്കുന്ന ആദ്യ മലയാളം സീരീസ് ആണ് 'ജയ് മഹേന്ദ്രൻ'. രാഷ്ട്രീയ പ്രമേയം കൈകാര്യം ചെയ്യുന്ന ഈ സീരീസ് സംവിധാനം ചെയ്യന്നത് ശ്രീകാന്ത് മോഹനാണ്. 

ദേശീയ, സംസ്ഥാന പുരസ്‌കാരങ്ങൾ നേടിയിട്ടുള്ള സംവിധായകന്‍ രാഹുൽ റിജി നായരാണ് 'ജയ് മഹേന്ദ്രന്റെ' കഥയെഴുതുന്നതും സീരീസ് നിർമിക്കുന്നതും. സുഹാസിനി, മിയ, സുരേഷ് കൃഷ്‍ണ, മണിയൻപിള്ള രാജു, ജോണി ആന്റണി, ബാലചന്ദ്രൻ ചുള്ളിക്കാട്, വിഷ്‍ണു ഗോവിന്ദൻ, സിദ്ധാർഥ ശിവ, രാഹുൽ റിജി നായർ എന്നിവരും സീരീസിൽ കേന്ദ്രകഥാപാത്രങ്ങളായി എത്തുന്നു.

രാഷ്ട്രീയ സ്വാധീനവും ആരെയും കൈയിലെടുക്കാനുള്ള കൗശലവും കൊണ്ട് തനിക്കാവശ്യമുള്ളതൊക്കെ സാധിച്ചെടുക്കാൻ മിടുക്കുള്ള ഓഫീസർ മഹേന്ദ്രന്റെ കഥയാണിത്. എന്നാൽ മഹേന്ദ്രനും ഇതേ രാഷ്ട്രീയ തന്ത്രങ്ങളുടെ ഇരയായതോടെ അയാൾക്ക് തന്റെ ഓഫിസിലുണ്ടായിരുന്ന അധികാരവും സ്വാതന്ത്ര്യവും നഷ്‍ടമാകും. അയാളുടെ ആശയങ്ങളും ചിന്താഗതിയും എല്ലാം ചോദ്യം ചെയ്യപ്പെടുന്ന അവസ്ഥയിലേക്ക് കാര്യങ്ങൾ നീങ്ങുന്നു.

ജോലി സംരക്ഷിക്കുന്നതിനും കൈമോശം വന്ന സൽപ്പേര് വീണ്ടെടുക്കുന്നതിനുമായി പിന്നീട് 'മഹേന്ദ്രൻ' വല്ലാതെ കഷ്‍ടപ്പെടുന്നു. വേണ്ടിവന്നാൽ അതിന് സിസ്റ്റത്തെ മുഴുവൻ അട്ടിമറിക്കാനും അയാൾ തയ്യാറാകും. ഇതില്‍ മഹീന്ദ്രന്‍ വിജയിക്കുമോ തോല്‍ക്കുമോ എന്നതാണ് സീരീസ് പറയുന്നത്.