നാല് പതീറ്റാണ്ടുകള് നീണ്ടുനിന്ന അഭിനയ ജീവിതത്തിലൂടെ കേരളത്തിനകത്തും പുറത്തും നിരവധി ആരാധകരെ സ്വന്തമാക്കിയിട്ടുള്ള താരമാണ് മോഹന്ലാല്.
സംവിധാന രംഗത്തേക്ക് എന്ന്? എന്ന ആരാധകരുടെ ചോദ്യത്തിന് ഇതുവരെ വ്യക്തമായ മറുപടി താരം നല്കിയിരുന്നില്ല.
എന്നാല്, ഇപ്പോഴിതാ, തന്റെ ആദ്യ സംവിധാന സംരംഭത്തെ കുറിച്ച് തുറന്നു പറഞ്ഞ് ആരാധകരെ ഞെട്ടിച്ചിരിക്കുകയാണ് താരം.
തന്റെ പുതിയ ബ്ലോഗിലൂടെയാണ് ആരാധകരെയും പ്രേക്ഷകരെയും ഞെട്ടിച്ച് കൊണ്ട് മോഹന്ലാല് ഇക്കാര്യം പങ്കുവച്ചത്.
‘ഇതുവരെ ചെയ്യാത്ത ചില കാര്യങ്ങൾ ചെയ്യാൻ കൊതിക്കുന്ന ഒരു മനസാണ് എന്റേത്.. അതെ, ഞാനൊരു സിനിമ സംവിധാനം ചെയ്യാൻ പോകുന്നു.’- മോഹന്ലാല് കുറിച്ചു.
"ബറോസ്സ്' എന്ന ടൈറ്റിലില് പുറത്തിറങ്ങുന്ന ചിത്രം കുട്ടികള്ക്കും വലിയവര്ക്കും ഒരുപോലെ ആസ്വദിക്കാന് കഴിയുന്ന 3ഡി സിനിമയായിരിക്കുമെന്ന് ലാല് വ്യക്തമാക്കി.
ചിത്രത്തില് ബറോസ്സായി വേഷമിടുന്നത് മോഹന്ലാല് തന്നെയാണ്. സംവിധാനം എന്ന കിരീടത്തിന്റെ ഭാരം നന്നായിട്ടറിയാമെന്നും ഇപ്പോള് തന്റെ ശിരസ്സിലും ആ ഭാരം അമരുന്നുവെന്നും താരം കൂട്ടിച്ചേര്ത്തു.
3ഡി സ്റ്റേജ് ഷോ എന്ന ആശയവുമായി ബന്ധപ്പെട്ട ചർച്ചയിൽനിന്നാണ് ആദ്യ സിനിമയിലേക്ക് എത്തിയതെന്ന് താരം വെളിപ്പെടുത്തി.
"മൈ ഡിയര് കുട്ടിച്ചാത്തന്' സിനിമയുടെ സംവിധായകന് ജിജോയുമായുള്ള സംഭാഷണമാണ് തന്നെ ഇതിലേയ്ക്ക് എത്തിച്ചതെന്നും അദ്ദേഹം വ്യക്തമാക്കി.
മോഹന്ലാല് അഭിനയിക്കുന്ന ഓരോ ചിത്രത്തിന്റെ റിലീസും ആവേശത്തോടെ കാത്തിരിക്കുന്ന ആരാധകരുടെ ഇപ്പോഴത്തെ കാത്തിരിപ്പ് മോഹന്ലാല് എന്ന സംവിധായകന് വേണ്ടിയാണ്.