Prithviraj Sukumaran: 'അമ്മ'യ്ക്ക് വീഴ്ച പറ്റി, പഴുതടച്ചുള്ള അന്വേഷണം വേണം, സിനിമയില്‍ പവ‍ര്‍ ഗ്രൂപ്പ് ഇല്ലാതാകണമെന്ന് പൃഥ്വിരാജ്

എല്ലാ സംഘങ്ങളുടെ തലപ്പത്തും സ്ത്രീകൾ വേണമെന്നാണ് തന്റെ അഭിപ്രായമെന്ന് പൃഥ്വിരാജ്

കൊച്ചി: ഹേമ കമ്മിറ്റി റിപ്പോ‍ര്‍ട്ടിലെ ആരോപണങ്ങളുടെ പശ്ചാത്തലത്തില്‍ അഭിനേതാക്കളുടെ സംഘടനയായ അമ്മയെ തള്ളി നടൻ പൃഥ്വിരാജ്. അമ്മ സംഘടനയ്ക്ക് വീഴ്ച സംഭവിച്ചതായി പൃഥ്വിരാജ് വ്യക്തമാക്കി. ഹേമ കമ്മിറ്റിയിലെ ആരോപണ വിധേയരുടെ പേര് പുറത്തുവിടുന്നതിൽ തടസ്സമില്ല. അതിൽ തീരുമാനമെടുക്കേണ്ടത് സർക്കാരാണ്. ആരോപണ വിധേയർ സ്ഥാനങ്ങളിൽ നിന്നും മാറി നിൽക്കണമെന്നും പൃഥ്വിരാജ് പറഞ്ഞു. ആരോപണം ശരിയാണെന്ന് കണ്ടെത്തിയാൽ നടപടി ഉണ്ടാകണമെന്നും മറിച്ച്, തെറ്റെന്നു തെളിഞ്ഞാൽ തിരിച്ചും നടപടി വേണമെന്നും താരം കൂട്ടിച്ചേർത്തു.

സിനിമ മേഖലയില്‍ പവ‍ര്‍ ഗ്രൂപ്പുണ്ടെങ്കില്‍ അത് ഇല്ലാതാകണമെന്ന് നടൻ പൃഥ്വിരാജ്. താൻ പവ‍ര്‍ ഗ്രൂപ്പിന്റെ നടപടികള്‍ക്ക് ഇരയായില്ലെന്നതിനാല്‍ അത്തരമൊരു ഗ്രൂപ്പ് ഇല്ലെന്നും ഉണ്ടെന്നും പറയാനാകില്ലെന്ന് പൃഥ്വിരാജ് പറഞ്ഞു. നിലപാട് പറഞ്ഞതിന്റെ പേരില്‍ തനിക്കും വിലക്ക് ലഭിച്ചിട്ടുണ്ടെന്നും പൃഥ്വിരാജ് കൂട്ടിച്ചേര്‍ത്തു. സിനിമ മേഖലയില്‍ നിലപാട് സ്വീകരിച്ചതിന്റെ പേരില്‍ വിലക്കിന്റെ ഇരയായ വ്യക്തിയാണ് താൻ. സിനിമയില്‍ ബഹിഷ്കരണമോ വിലക്കോ പാടില്ലെന്നും പൃഥ്വിരാജ് വ്യക്തമാക്കി. ആരോപണങ്ങളില്‍ മാതൃകാപരമായ നടപടികള്‍ അമ്മ സംഘടന സ്വീകരിക്കണമെന്നും തിരുത്തലുകള്‍ അനിവാര്യമാണെന്നും പൃഥ്വിരാജ് പറഞ്ഞു.