अखेर देशात Omicron चा शिरकाव, जाणून घ्या काय आहेत याची लक्षणं आणि कसा कराल बचाव

बंगळुरु : कोरोना विषाणूचा नवीन प्रकार omicron व्हेरिएंटने देशात शिरकाव केलाय. केंद्रीय आरोग्य मंत्रालयाच्या माहितीनुसार, बुधवारी रात्री उशिरा देशात ओमिक्रॉन प्रकारांची दोन प्रकरणे आढळून आली. या रुग्णांवर उपचार सुरू आहेत. आरोग्य मंत्रालयाचे सहसचिव लव अग्रवाल यांनी सांगितले की, कर्नाटकात ओमिक्रॉन प्रकारांची दोन्ही प्रकरणे आढळून आली आहेत.

ज्या 2 रुग्णांना ओमिक्रॉनची लागण झालीये, त्यापैकी एक 66 वर्षीय पुरुष आहे तर दुसरा 46 वर्षीय पुरुष आहे. त्यांचे कॉन्टॅक्ट ट्रेसिंग सुरू आहे. देशात कोरोनाचे नवीन प्रकार दाखल झाल्यानंतर लोकांमध्ये भीतीचे वातावरण आहे. याबाबत तज्ज्ञांचे म्हणणे आहे की, याला घाबरण्याऐवजी सावधगिरी बाळगण्याची गरज आहे. त्याची लक्षणे आणि आवश्यक खबरदारी जाणून घेऊया.

ओमिक्रॉनच्या रुग्णामध्ये दिसली ही लक्षणं

बीबीसीच्या अहवालानुसार, डॉ. अँजेलिक कोएत्झी यांनी दक्षिण आफ्रिकेतील पहिले ओमिक्रॉन प्रकार ओळखले आहे. त्या दक्षिण आफ्रिकन मेडिकल असोसिएशनच्या अध्यक्षाही आहेत. एएफपीशी केलेल्या संभाषणादरम्यान, त्याने सांगितले की त्यांना प्रथम 30 वर्षांच्या तरुणामध्ये याची लक्षणे दिसली. त्या तरुणाला खूप थकल्यासारखे वाटणे, सौम्य डोकेदुखी, संपूर्ण शरीर वेदना, घसा खवखवणे, कोरडा खोकला अशी लक्षणं दिसत होती.

दक्षिण आफ्रिकेतील डॉक्टरांना ओमिक्रॉनची लागण झालेल्या रुग्णांमध्ये अत्यंत थकवा, स्नायू दुखणे, घसा खवखवणे आणि कोरडा खोकला अशी लक्षणे आढळून आली. तर काही रुग्णांना काही प्रमाणात ताप देखील होता. डॉक्टरांनी ही लक्षणे रुग्णांच्या लहान गटाला पाहिल्यानंतर सांगितली असली तरी. ओमिक्रॉनची लागण झालेल्या बहुतांश रुग्णांमध्ये अशी लक्षणे दिसतात की नाही याबाबत आताच स्पष्ट दावा करता येणार नाही.

Omicron या नवीन प्रकाराबद्दल अजून फारसा अभ्यास झालेला नाही. अनेक देशांमध्ये तज्ञ त्याचा अभ्यास करत आहेत. सध्या, दक्षिण आफ्रिकेच्या नॅशनल इन्स्टिट्यूट ऑफ कम्युनिकेबल डिसीजेस (NICD) नुसार, B.1.1.1.529 प्रकाराच्या संसर्गानंतर आतापर्यंत कोणतीही असामान्य लक्षणे आढळलेली नाहीत. एनआयसीडीने असेही नोंदवले आहे की, डेल्टा सारख्या इतर संसर्गजन्य उत्परिवर्तनांसह कोरोना विषाणूच्या ओमिक्रॉन प्रकाराने संक्रमित काही रुग्ण लक्षणे नसलेले आहेत.

तिसरी लाट येणार?

काही शास्त्रज्ञांनी ओमिक्रॉनमुळे तिसऱ्या लाटेच्या आगमनाची भीती व्यक्त केली आहे. मात्र, हा अभ्यास अजून व्हायचा आहे. संशोधकांच्या मते, हा प्रकार डेल्टापेक्षा 7 पट वेगाने पसरत आहे. डेल्टा वेरिएंटच्या संसर्गापेक्षा एका व्यक्तीपासून दुसऱ्या व्यक्तीमध्ये त्याचा प्रसार जास्त आहे. हा प्रकार ओळखला जाण्यापूर्वी 32 वेळा उत्परिवर्तित झाला आहे. मात्र, आवश्यक ती खबरदारी घेतली तर तिसरी लाट येईलच असे नाही, असेही तज्ज्ञांचे म्हणणे आहे. आपण सावधगिरी बाळगली पाहिजे.

संरक्षणासाठी कोणती खबरदारी घेणे आवश्यक आहे?

वर्ल्ड हेल्थ ऑर्गनायझेशन (WHO) ने आशिया क्षेत्रातील देशांना सतर्कता वाढवण्यास आणि सार्वजनिक आरोग्य सेवा मजबूत करण्यास सांगितले आहे. WHO ने लग्न किंवा इतर उत्सव, सण आणि गर्दीच्या कार्यक्रमांमध्ये सर्व खबरदारीच्या उपायांचा अवलंब करण्याचा सल्ला दिला आहे.

बचावाचे उपाय जितक्या लवकर लागू केले जातील, तेवढे कमी निर्बंध देशांना लागू करावे लागतील. कोविडचा जितका जास्त प्रसार होईल तितकी व्हायरसला उत्परिवर्तन करण्याची संधी मिळेल आणि ही महामारी वाढतच जाईल.