द्रोपदी मुर्मू की यशवंत सिन्हा? कोण बनणार नवीन राष्ट्रपती? आज लागणार निकाल

मुंबई : देशात नव्या राष्ट्रपतींच्या निवडीसाठी आज सकाळपासून मतमोजणी होणार आहे. ही मतमोजणी सकाळी 11 वाजता संसद भवनात सुरू होईल. द्रौपदी मुर्मू आणि यशवंत सिन्हा यांच्यापैकी कोणीही उमेदवार 5 लाख 49 हजार 442 मते मिळवतील तो ही निवडणूक जिंकेल. 25 जुलै रोजी नवीन अध्यक्षांना पद आणि गोपनीयतेची शपथ दिली जाईल.

राष्ट्रपतीपदाच्या निवडणुकीत द्रौपदी मुर्मू यांचा विजय निश्चित मानून भाजपने जोरदार तयारी केली आहे. मतमोजणी संपल्यानंतर आज सायंकाळी 5.30 वाजता दिल्लीतील पंत मार्ग ते राजपथ असा रोड शो होणार आहे. ज्यामध्ये पक्षाचे राष्ट्रीय अध्यक्ष जेपी नड्डा आणि दिल्ली प्रदेशाध्यक्ष आदेश गुप्ता नेतृत्व करणार आहेत. या रोड शोमध्ये पक्षाचे अनेक खासदार, आमदार आणि पदाधिकारी सहभागी होणार आहेत. 

राष्ट्रपतीपदाच्या निवडणुकांसाठी सोमवारी म्हणजेच 18 जुलै रोजी मतदान झालं होतं. भाजपप्रणित एनडीएतर्फे द्रौपदी मुर्मू आणि विरोधी पक्षांच्या वतीने यशवंत सिन्हा हे दोन उमेदवार रिंगणात आहेत. दरम्यान या निवडणुकीत द्रौपदी मुर्मू यांचं पारडं जड असल्याचं मत राजकीय निरीक्षकांनी व्यक्त केलं आहे.

जर द्रौपदी मुर्मू राष्ट्रपतीपदाच्या निवडणुकीत जिंकल्या तर त्या देशाच्या पहिल्या आदिवासी महिला राष्ट्रपती बनतील. यापूर्वी आजपासून 15 वर्षांपूर्वी आजच्याच दिवशी 21 जुलै रोजी देशाला पहिल्या महिला राष्ट्रपती मिळाल्या. प्रतिभा देवीसिंह पाटील या पहिल्या महिला राष्ट्रपती होत्या.