TATA आणखी एक कंपनी घेणार विकत, लवकरच शिक्कामोर्तब होण्याची शक्यता

मुंबई : भारतीय मोटार कंपनी टाटा मोटर्स तामिळनाडू आणि गुजरातमधील फोर्डचा प्लांट्स खरेदी करण्यासाठी प्राथमिक चर्चेत आहे. गेल्या महिन्यात, अमेरिकन कार दिग्गजाने जाहीर केले होते की ते भारतात कारचे उत्पादन थांबवतील आणि देशातील त्याचे दोन्ही उत्पादन प्रकल्प बंद करतील. 

जर टाटा मोटर्सने फोर्डशी यशस्वी वाटाघाटी केली तर ते त्यांचे प्लांट खरेदी करु शकतात. अमेरिकन ऑटोमेकरकडून टाटाची ही दुसरी मालमत्ता खरेदी असेल. यापूर्वी मार्च 2008 मध्ये टाटा समूहाने फोर्ड कडून 2.3 अब्ज डॉलरमध्ये जग्वार लँड रोव्हर खरेदी केली होती.

अनेक माध्यमांच्या अहवालात नमूद करण्यात आले आहे की, तामिळनाडू सरकार टाटा समूहासोबत चेन्नईच्या मरैमलाई नगरमध्ये फोर्ड इंडिया युनिट्सच्या संभाव्य अधिग्रहणावर चर्चा करत आहे. तसेच, टाटा सन्सचे अध्यक्ष एन चंद्रशेखरन यांनी बुधवारी तामिळनाडूचे मुख्यमंत्री एमके स्टालिन आणि राज्याचे उद्योगमंत्री थंगम थेन्नरासू यांच्याशी चर्चा केली.

या चर्चेचा तपशील उघड झाला नसला तरी, दोन आठवड्यांच्या कालावधीत टाटा समूहाचे अधिकारी मुख्यमंत्र्यांना भेटण्याची ही दुसरी वेळ आहे. तत्पूर्वी 27 सप्टेंबर रोजी टाटा मोटर्सचे कार्यकारी संचालक गिरीश वाघ यांनी स्टालिन यांची भेट घेतली.

सध्या भारतातील सर्वात मोठी वाहन उत्पादक कंपनी टाटा मोटर्सचा तामिळनाडूमध्ये कोणताही उत्पादन प्रकल्प नाही. गुजरातमध्ये त्याचा उत्पादन प्रकल्प आहे, जो फोर्डच्या उत्पादन केंद्राच्या अगदी जवळ आहे. सर्वात महत्त्वाचे म्हणजे, तामिळनाडू राज्याला फोर्डच्या युनिट्ससाठी नवीन मालक शोधायचा आहे जेणेकरून ते नोकऱ्या वाचवू शकतील आणि फोर्डच्या उत्पादन कारखाने बंद करण्याच्या निर्णयामुळे लहान आणि मध्यम उद्योगांना प्रभावित होऊ नये. अमेरिकन वाहन कंपनी फोर्डने गेल्या 10 वर्षात 2 अब्ज डॉलर्सचे प्रचंड नुकसान सहन केल्यानंतर भारत सोडण्याचा निर्णय घेतला.

टाटा मोटर्स या करारावर शिक्कामोर्तब करण्याचा निर्णय घेऊ शकतात. टाटा मोटर्सच्या प्रवक्त्याने सांगितले की, चंद्रशेखरन यांची मुख्यमंत्र्यांशी बैठक झाली, परंतु त्यांनी अधिक तपशील देण्यास नकार दिला. फोर्ड इंडियाच्या प्रवक्त्याने दिलेल्या माहितीनुसार, आम्ही आमच्या उत्पादन सुविधांसाठी संभाव्य पर्याय शोधत आहोत. मोतीलाल ओसवाल फायनान्शियल सर्व्हिसेसचे प्रमुख सिद्धार्थ खेमका यांनी एका दैनिकाला सांगितले की, हा व्यवहार टाटा मोटर्ससाठी अर्थपूर्ण आहे कारण राज्य सरकारकडून अपेक्षित असलेल्या काही नफ्यांसह ही एक संकटपूर्वी विक्री असेल.