70mm च्या बादशाहचे सत्तरीत पदार्पण

झी २४ तास वेब टीम, मुंबई

बॉलिवूड अभिनेता बिग बी अमिताभ बच्चन यांचा आज वाढदिवस आहे. अमिताभ बच्चन आज ७०व्या वर्षांत पदर्पण करत आहे. त्यांच्या वाढदिवसाच्या निमित्ताने त्यांच्यावर देशभरातून चाहत्यांच्या शुभेच्छांचा वर्षाव होत आहे.

आपल्या दमदार आवाजाने रसिकांवर मोहिनी घालणारे अमिताभ सत्तरीतही तितक्याच जोशात, उत्साहात काम करत आहेत. सत्तरच्या दशकात यशाच्या शिखरावर असलेले शहेनशहा सत्तरीतही प्रसिद्धीच्या शिखरावर आहे हे विशेष.

अमिताभ यांनी १९६९ साली बॉलिवूडमध्ये आपल्या अभिनय कारकीर्दीची सुरुवात केली. ख्वाजा अहमद अब्बास यांनी दिग्दर्शित केलेला ‘सात हिंदुस्तानी’ हा त्यांचा पहिला चित्रपट होता. बॉक्स ऑफिसवर हा चित्रपट सपशेल आपटला. मात्र त्यानंतर आलेल्या ‘जंजीर’ चित्रपट त्यांच्या परिपूर्ण अभिनयाने सजला आणि त्यांची ‘अँग्री यंग मॅन’ अशी ओळख निर्माण झाली. मात्र त्यानंतर त्यांनी मागे वळून पाहिलं नाही आणि ते  यशाच्या शिखरावर विराजमान झाले.

दरम्यान अमिताभ आज आपला वाढदिवस साध्या पद्धतीने साजरा करणार असले तरी त्यांच्या जन्मगावी म्हणजेच उत्तर प्रदेशच्या अलाहाबादमध्ये त्यांचा वाढदिवस थाटामाटात साजरा झाला. बिग बीच्या चाहत्यांनी अमिताभ यांच्या नावाने केक कापला आणि त्यांच्या फोटोलाच आरती ओवाळली.