धर्मेंद्र, सनी, बॉबीची धम्माल पुन्हा एकदा!

सिनेमा : यमला, पगला, दिवाना - २
दिग्दर्शक : संगीत सिवन
कलाकार : धर्मेंद्र, बॉबी देओल, सनी देओल, अनुपम खेर, जॉनी लिवर, सुचेता शर्मा, नेहा शर्मा, क्रिस्टिना अखीवा
www.24taas.com, झी मीडिया, नवी दिल्ली
देओल कुटुंबीयांनी पुन्हा एकदा पडद्यावर लोकांना हसवण्यासाठी एकत्र प्रयत्न केलाय. ‘यमला पगला दिवाना – २’मध्ये पुन्हा एकदा धर्मेंद्र आपल्या दोन्ही मुलांसोबत म्हणजेच बॉबी आणि सनी देओलसोबत धम्माल करताना दिसणार आहे. फूल टू मसाला असाच हा सिनेमा आहे. पण, ‘यमला पगला दिवाना’चा पहिल्या भागापेक्षा हा भाग थोडा फिकाच वाटतो.
सिनेमाची कथा धर्मेंद्र, सनी आणि बॉबी या तिघांच्या भोवतीच घुटमळते. धरम (धर्मेंद्र) आपला छोटा मुलगा गजोधरसोबत (बॉबी देओल) वारणसीमध्ये मोठ्या थाटात राहतोय. धरमचा मोठा मुलगा परमवीर (सन्नी देओल) हा ब्रिटनमध्ये राहतो. परमवीरकडून आर्थिक मदत मिळाल्यानंतर धरम आणि गजोधर लोकांना ‘उल्लू’ बनवून त्यांना भंडावून सोडण्याच्या कामात व्यस्त आहेत.
धरम आणि गजोधर ब्रिटनचा एक व्यावसायिक असलेल्या योगराज खन्ना (अन्नू कपूर) याला आपल्या जाळ्यात ओढण्याचा प्रयत्न करतात. योगराज यमला बाबाचा आशिर्वाद घेण्यासाठी ब्रिटनवरून भारत आलाय. योगराजबरोबर त्याची मुलगी सुमन (नेहा शर्मा) हीदेखील भारतात आलीय. सुमन बॉलिवूड स्टार सलमान खानची खूप मोठी फॅन आहे. गजोधरनं सुमनला आपल्या प्रभावाखाली घ्यावं अशी धरमची इच्छा आहे कारण त्यामुळे त्यांनाही ब्रिटनमध्ये जाण्याची संधी मिळू शकणार आहे. पिता-पुत्र आपल्या या प्रयत्नात यशस्वी होतात आणि ब्रिटनमध्ये पोहचतात.
धरम आणि गजोधर ब्रिटनमध्ये पोहचल्यानंतर त्यांना माहित पडतं की त्यांनी खूप मोठा ‘पंगा’ आपल्या अंगावर ओढावून घेतलाय. इथं येऊन दोघांना माहीत पडतं की परमवीर खन्नासाठीच काम करतोय. इथूनच सिनेमा वेगळ्या ढंगात आणखी मजेशीर, धम्माल प्रसंग घेऊन पुढे सरकतो. अभिनयाचं म्हटलं तर धर्मेंद्र, सनी आणि बॉबी थोडे कमी पडलेले जाणवतात. तिन्ही अनुभवी कलाकारांकडून प्रेक्षकांना मोठ्या अपेक्षा आहेत.
बॉलिवूडमध्ये या सिनेमाच्या माध्यमातून प्रवेश करणाऱ्या क्रिस्टिना अखीवा प्रेक्षकांना आपल्याकडे आकर्षित करण्यात अपयशी ठरलीय. तिला आणखी खूप काही शिकणं बाकी आहे. परंतू या सिनेमात अनुपम खेर, जॉनी लिवर आणि सुचेता शर्मा यांनी आपल्या भूमिकांना योग्य न्याय दिलाय. सिनेमातील संगीतही प्रेक्षकांवर फार मोठा परिणाम करत नाही.