फलटण ते अकलूज रेल्वेमार्गाला अखेर मंजुरी

सोलापूर : कित्येक वर्षांपासूनची मागणी असलेल्या फलटण ते अकलूज रेल्वेमार्गाला अखेर मंजुरी मिळाली आहे. यासाठी अर्थसंकल्पामध्ये तरतूदही केली जाणार आहे. पंढरपूर - फलटण रेल्वे संघर्ष समितीनं ही माहिती दिली. 

रासपचे अध्यक्ष आणि पशुसवंर्धन मंत्री महादेव जानकर यांच्या सोबत अकलूजच्या शिष्टमंडळानं, रेल्वेमंत्री सुरेश प्रभू यांची नुकतीच भेट घेतली. पंढरपूर - फलटण रेल्वेमार्ग ब्रिटिशांच्या काळात निर्माण करण्यात आला आहे. 

१०९ किलोमीटर लांबीच्या या मार्गासाठी ४०० कोटी रुपयांचा खर्च अपेक्षीत आहे. फलटण - अकलूज मार्गाबरोबरच मराठवाड्यातल्या आष्टी - जामखेड - ढवळस रेल्वेमार्गासाठी सुद्धा आगामी बजेटमध्ये निधीची तरतूद केली जाणार आहे.