माळशेज अपघात: मृतांच्या नातेवाईकांना ५ लाख, जखमींना ५० हजारांची मदत

www.24taas.com, झी मीडिया, ठाणे
माळशेज एसटी अपघातातील मृतांच्या नातेवाईकांना ५ लाखांची आर्थिक मदत जाहीर करण्यात आलीय. मुख्यमंत्री पृथ्वीराज चव्हाण यांनी २ लाख रुपये तर परिवहन महामंडळानं ३ लाख रुपये मुख्यमंत्री निधीतून जाहीर केले आहेत.
तर जखमींचे उपचार सरकारी खर्चातून आणि ५० हजारांची आर्थिक मदत जाहीर करण्यात आलीय.
ठाणे आगरातून अहमदनगरच्या दिशेने निघालेल्या एसटीला गुरुवारी सकाळी १० वाजण्याच्या सुमारास माळशेज घाटात भीषण अपघात झाला. एका नागमोडया वळणावर टेम्पोशी धडक टाळण्याच्या प्रयत्न करण्याच्या नादात बसवरील नियंत्रण सुटले. त्याचवेळी टेम्पोने धडक दिल्याने बस १५० फूट दरीत कोसळली. या अपघातात ३७ जण ठार झाल्याची भीती व्य़क्त होत आहे. एसटी चालक आणि वाहक अजूनही बेपत्ता आहेत.
अपघातातील अनेकांना वाचविण्यासाठी युद्धपातळीवर मदतकार्य सुरू आहे. एसटीचे अधिकारी आणि अग्नीशमन दलाचे अधिकारी घटनास्थळी पोहोचले आहे. पोलीस आणि अग्नीशमन दलाचे जवान स्थानिक नागरिकांच्या सहकार्याने मदतकार्य करीत आहेत. स्थानिकांनी दिलेल्या माहितीनुसार एसटीची दोन तुकडे झाले आहेत. मुरबाडचे आमदार किसन काथोरे यांनी आपल्या कार्य़कर्त्यांसह घटनास्थळी मदतकार्य सुरू ठेवलेय.
माळशेज घाटात संरक्षक कठडे बांधण्यात सरकारने उशीर केला आहे. त्यामुळे हा आजचा अपघात झाला आहे. या अपघातात अनेक निष्पाप जीवांचे प्राण गेले आहेत. या अपघाताबाबत सरकारचा तीव्र निषेध करतो, अशी तीव्र प्रतिक्रिया अनेक नागरिकांनी व्यक्त केलेय. सार्वजनिक बांधकाम विभाग या अपघाताला जबाबदार असल्याचा आरोप करण्यात येत आहे. दरम्यान, एस टी अपघातातील अनेकांना वाचविण्यासाठी युद्धपातळीवर मदतकार्य सुरू आहे.