Pro Kabaddi League: बंगाल वॉरियर्स कडून हरियाणा स्टीलर्सला पराभवाचा धक्का, संघावर 39-32 अशी केली मात
Bengal Warriors vs Haryana Steelers: बंगाल वॉरियर्स संघाने गुणतालिकेत अव्वल स्थानी असलेल्या हरियाणा स्टीलर्स संघावर 39-32 अशी मात करीत प्रो कबड्डी स्पर्धेत अनपेक्षित निकाल नोंदवला.
)
PKL 11: खोलवर चढाया आणि भक्कम पकडी असा चतुरस्त्र खेळ करीत बंगाल वॉरियर्स संघाने गुणतालिकेत अव्वल स्थानी असलेल्या हरियाणा स्टीलर्स संघावर 39-32 अशी मात करीत प्रो कबड्डी स्पर्धेत अनपेक्षित निकाल नोंदविला. पूर्वार्धात हा सामना १७-१७ असा बरोबरीत होता.
श्री शिवछत्रपती क्रीडा संकुल म्हाळुंगे बालेवाडी येथील बॅडमिंटन हॉलमध्ये सुरू असलेल्या या स्पर्धेत पहिल्या सामन्या इतकाच हरियाणा स्टीलर्स व बंगाल वॉरियर्स यांच्यातील सामना विलक्षण चुरशीने खेळला गेला. दोन्ही संघांमध्ये सुरुवातीपासूनच आघाडी घेण्यासाठी सतत चढाओढ दिसून आली. हरियाणा संघाकडून विनय व शिवम पठारे यांनी खोलवर चढाया केल्या तर बंगाल संघाकडून मनिंदर सिंग व प्रणय राणे यांनी जोरदार चढाया करीत अधिकाधिक गुण वसूल करण्याचे प्रयत्न केले. पूर्वार्धात काही सेकंद बाकी असताना बंगाल वारियर्सने लोण नोंदवित १७-१७ अशी बरोबरी साधली. मध्यंतराला हीच बरोबरी होती.
हे ही वाचा: हृदयद्रावक! ८ दिवसांवर लग्न पण काळाने घात केला; कुमार महाराष्ट्र केसरी विजेत्याचे अचानक निधन
हे ही वाचा: Junior Asia Cup: विजेतेपदाची हॅट्ट्रिक! भारताने अंतिम फेरीत पाकिस्तानला हरवत रचला इतिहास
उत्तरार्धात कसा रंगला सामना?
उत्तरार्धातही दोन्ही संघांनी एकमेकांविरुद्ध आघाडी घेण्याचे सातत्याने प्रयत्न केले. शेवटची चार मिनिटे बाकी असताना बंगाल वारियर्सने ३३-२७ अशी आघाडी घेतली होती. त्यांनीही आघाडी वाढवीत सामन्यावरील पकड घट्ट केली होती. अखेर ही लढत त्यांनी ३९-३२ अशी जिंकली. त्यांच्याकडून मनिंदर सिंग (११ गुण) व प्रणय राणे (६ गुण) यांनी जोरदार चढाया केल्या. मनजीत व फाझल अत्राचेली यांनी प्रत्येकी तीन गुण नोंदविले. पराभूत संघाकडून विनय (दहा गुण) व शिवम कटारे (८ गुण)यांची लढत अपुरी पडली.