डोनाल्ड ट्रम्प यांचा हुकूमशहा किम जोंग उनला जोरदार झटका

नवी दिल्ली : अमेरिकेचे राष्ट्राध्यक्ष डोनाल्ड ट्रम्प यांनी गुरुवारी नॉर्थ कोरियाचा हुकूमशहा किम जोंग उन यांच्यासोबत आयोजित करण्यात आलेली बैठक रद्द करून जोरदार झटका दिलाय. ही बैठक १२ जून रोजी सिंगापूरमध्ये आयोजित करण्यात आली होती. न्यूज एजन्सीच्या म्हणण्यानुसार, ट्रम्प यांनी हा निर्णय किम जोंग उन यांच्या वक्तव्यांवर नाराज झाल्यानं घेतलाय.

यापूर्वी अमेरिकेचे राष्ट्राध्यक्ष डोनाल्ड ट्रम्प यांनी किम यांच्यासोबत होणार असलेल्या बैठकीला दुजोरा दिला होता. सिंगापूर बैठकीबद्दल येत्या आठवड्यात स्पष्ट होईल... आम्ही गेलो तर उत्तर कोरियासाठी ही एक मोठी गोष्ट असेल, असं यावेळी ट्रम्प यांनी म्हटलं होतं. 

यापूर्वी चीनच्या न्यूज एजन्सीनं दिलेल्या माहितीनुसार, उत्तर कोरियानं पुंगेय-रीमध्ये स्थित अणुचाचणी टेस्ट साईट बंद केलीय. या साईटवर आत्तापर्यंत ६ अणुचाचण्या करण्यात आल्यात. या बैठकीआधी किम यांनी अणुचाचण्या आणि साईट बंद करण्याचं आश्वासन दिलं होतं, हे विशेष... 

जगातले सध्याचे कट्टर शत्रू म्हणून ओळखले जाणारे अमेरिकन राष्ट्राध्यक्ष डोनाल्ड ट्रम्प आणि उत्तर कोरियाचा हुकूमशाह किम जाँग ऊन यांच्यातील ताणले गेलेले संबंध मे महिन्याच्या अखेरीस आयोजित करण्यात आलेल्या बैठकीनंतर सुधारण्याची शक्यता वर्तवण्यात येत होती.