ચમત્કારિક દવાએ આ કંપની બનાવી દીધી યુરોપની સરતાજ, માર્કેટ કેપ રિલાયન્સ કરતાં બમણું થયું

Business News: વિશ્વના બીજા સૌથી ધનિક વ્યક્તિ બર્નાર્ડ આર્નોલ્ટની ફ્રેન્ચ લક્ઝરી કંપની LVMH હવે યુરોપની સૌથી મૂલ્યવાન કંપની નથી રહી. આ તાજ તેની પાસેથી છીનવાઈ ગયો છે. સ્થૂળતા ઘટાડવા માટે દવા બનાવતી ડેનિશ કંપનીએ તેને પાછળ છોડી દીધી છે. એશિયાના સૌથી મોટા ધનિક વ્યક્તિ મુકેશ અંબાણીની (Mukesh Ambani)કંપની રિલાયન્સ ઇન્ડસ્ટ્રીઝ (Reliance Industries) ભારતની સૌથી મૂલ્યવાન કંપની છે.

પરંતુ શું તમે જાણો છો કે યુરોપની સૌથી મૂલ્યવાન કંપની કોણ છે? અત્યાર સુધી આ ખિતાબ વિશ્વના બીજા સૌથી ધનિક વ્યક્તિ બર્નાર્ડ આર્નોલ્ટની ફ્રેન્ચ લક્ઝરી કંપની LVMH પાસે હતો. પરંતુ હવે તે બીજા સ્થાને સરકી ગઈ છે. વજન ઘટાડવાની દવા  Wegovy બનાવતી ડેનિશ કંપની Novo Nordiskએ હવે આ ખિતાબ હાંસલ કર્યો છે. કંપનીએ આ દવા બ્રિટનમાં લોન્ચ કરી છે. આ સાથે સોમવારે કંપનીના શેરમાં જોરદાર ઉછાળો જોવા મળ્યો હતો. આ સાથે કંપનીનું માર્કેટકેપ $428 બિલિયન પર પહોંચી ગયું છે.

Companymarketcap.com મુજબ, Novo Nordiskનું માર્કેટ કેપ $423.64 બિલિયન છે જ્યારે LVMHનું માર્કેટ કેપ $419.25 બિલિયન છે. આ રીતે, નોવો નોર્ડિસ્ક યુરોપની સૌથી મૂલ્યવાન કંપની બની ગઈ છે, જ્યારે તે વિશ્વની સૌથી મૂલ્યવાન કંપનીઓની યાદીમાં 17માં નંબર પર છે. આ યાદીમાં અમેરિકન કંપનીઓનું વર્ચસ્વ છે. આઇફોન નિર્માતા એપલ $2.962 ટ્રિલિયનના માર્કેટ કેપ સાથે પ્રથમ સ્થાને છે અને માઇક્રોસોફ્ટ $2.441 ટ્રિલિયનના માર્કેટ કેપ સાથે બીજા સ્થાને છે. ટોચની 10 કંપનીઓમાંથી નવ અમેરિકાની છે. આ લિસ્ટમાં રિલાયન્સ ઈન્ડસ્ટ્રીઝ $197.78 બિલિયનના માર્કેટ કેપ સાથે 54માં નંબર પર છે.

ચમત્કારિક દવા-
વેગોવી (Wegovy ) એક એવી દવા છે જે સ્થૂળતાની સારવારમાં કામ કરે છે. વિશ્વના સૌથી ધનિક વ્યક્તિ એલોન મસ્ક (Elon Musk) પણ આ દવાનો ઉપયોગ કરે છે. હોલીવુડમાં પણ તેની ભારે માંગ છે. આ દવાને અમેરિકામાં 2021માં મંજૂરી આપવામાં આવી હતી. તેને ચમત્કારિક દવા માનવામાં આવે છે. જો કે, નિષ્ણાતો કહે છે કે તે તંદુરસ્ત આહાર અને કસરતનો વિકલ્પ નથી. ટ્રાયલ્સમાં એવું જોવામાં આવ્યું છે કે જ્યારે લોકો આ દવાનો ઉપયોગ કરવાનું બંધ કરે છે, ત્યારે તેમનું વજન ફરીથી વધવા લાગે છે. કંપનીનું કહેવું છે કે તે તેનું ઉત્પાદન વધારવામાં વ્યસ્ત છે.