CNG પંપ સંચાલકોની હડતાલને લઈને મોટા સમાચાર, ગુજરાત સરકાર સાથેની બેઠક બાદ મોટો વળાંક

ઝી ન્યૂઝ/અમદાવાદ: CNG પંપ સંચાલકોની હડતાલને લઈને મહત્વના સમાચાર સામે આવ્યા છે. રાજ્ય સરકાર સાથેની બેઠક બાદ સીએનજી પંપ ચાલકોની હડતાળ મોકૂફ રાખી છે. 55 મહિનાથી સીએનજી વેચાણ પર માર્જીન ન મળતા પંપ ચાલકો કાલથી હડતાળ પર ઉતરવાના હતા. પરંતુ હાલ એક મોટો વળાંક આવ્યો છે. રાજ્યમાં 3 માર્ચથી કરવામાં આવેલી હડતાલની જાહેરાતને હવે મોકૂફ રાખવામાં આવી છે. તમને જણાવી દઈએ કે, CNGમાં કમિશન મુદ્દે હડતાળની જાહેરાત કરવામાં આવી હતી.

ઉલ્લેખનીય છે કે, આવતીકાલે 3 માર્ચથી રાજ્યના પેટ્રોલ પંપ પરથી થતું સીએનજીનુ વેચાણ અચોકક્સ મુદત માટે બંધ કરવાનો નિર્ણય લેવાયો હતો. ફેડરેશન ઓફ ગુજરાત પેટ્રોલિયમ એસોસિયેશન આ નિર્ણય કર્યો હતો. સીએનજી ડિલર્સ માર્જીન છેલ્લા 55 મહિનાથી ન વધવાનો કારણે આ અચોક્કસ મુદતની હડળાતની જાહેરાત કરી હતી. 

પેટ્રોલ ડિઝલથી રાજ્ય સરકારને કરોડોની આવક
ગુજરાત રાજ્યને પેટ્રોલ ડિઝલ સીએનજી અને પીએનજીના વેરા થકી કરોડોની આવક થાય છે. 2021-22 મા પેટ્રોલથી 6040 કરોડ, ડીઝલના 12731.79 કરોડ સીએનજીના 191.75 કરોડ રૂપિયા, પીએનજીના 68.09 કરોડ રૂપિયાની આવક થઈ છે. તો 2022-23 મા પેટ્રોલના 6008.69 કરોડ આવક, ડીઝલથી 13951.27 કરોડ આવક થઈ. તો સીએનજીના કારણે 198.44 કરોડ આવક પીએનજી ના 58.09 કરોડ રૂપિયા આવક થઈ છે.