બાળકનું લિફ્ટમાં ફસાઈ જતા મોત, Video થયો વાઇરલ

અમદાવાદ : લિફ્ટમાં બાળકનું માથું ફસાઈ જતા એનું મોત થયું હોવાનો વીડિયો સોશિયલ મીડિયામાં વાઇરલ થયો છે. જોકે આ વીડિયો ક્યાંનો છે એ જાણવા મળ્યું નથી. આ બાળકનું માથું ફસાઈ જતા માતા આક્રંદ કરતી નજરે ચડે છે. આ ઘટનાની સૌથી કરૂણ વાત એ છે કે માતાની સામે જ બાળકનું મોત નિપજ્યું છે. આ બાળક સ્કૂલ ડ્રેસમાં છે અને તેના ખભા પર પણ સ્કૂલ બેગ છે. આ દ્રશ્ય જોઈને એમ લાગે છે કે સ્કૂલથી પરત ફરતી વખતે બાળક આ અકસ્માતનો ભોગ બન્યું છે.

તાજેતરમાં અમદાવાદ ખાતે બનેલા એક બીજા કિસ્સામાં લિફ્ટમાં ભીંસાઈ જવાથી છ વર્ષના માસૂમ બાળકનું મૃત્યુ નિપજ્યું છે. ચાંદખેડાના ત્રાગડ રોડ ઉપર ઓમ પાર્ટી પ્લોટ સામે આવેલી 307 રેસિડન્સીમાં જોડીયા ભાઈ-બહેન લિફ્ટમાં જઈ રહ્યાં હતાં. બહેન મુસ્કાન લિફ્ટમાં જતી રહી અને બીજા માળે જવા બટન દાબ્યું હતું. જોડીયો ભાઈ મયંક મિશ્રા લિફ્ટમાં પ્રવેશવા દોડ્યો ત્યાં જ લિફ્ટનો લાકડાનો દરવાજો બંધ થયો ને લિફ્ટ ચાલુ થઈ ગઈ. છ વર્ષનો માસૂમ મયંક લિફ્ટની જાળીમાં ફસાયો ને પહેલા માળે લિફ્ટની જાળી અને દીવાલ વચ્ચે ભીંસાઈ ગયો. લિફ્ટ તોડીને બહાર કઢાયેલા મયંકને ખાનગી હોસ્પિટલમાં ડોક્ટરે મૃત જાહેર કર્યો હતો.