ઈસરોએ PSLV-C52 નું સફળતાપૂર્વક લોન્ચિંગ કર્યું, EOS-04 સાથે 2 સેટેલાઈટ અંતરિક્ષમાં મોકલ્યા

નવી દિલ્હી: ભારતીય અંતરિક્ષ અનુસંધાન સંગઠન (ISRO) એ આ વર્ષના પોતાના પહેલા મિશન હેઠળ આજે સેટેલાઈટ લોન્ચ કર્યો. આજે સવારે 5.59 વાગે મિશન પોલર સેટેલાઈટ લોન્ચ વ્હીકલને PSLV-C52 ને સતીશ ધવન સ્પેસ સેન્ટર શ્રીહરિકોટાથી લોન્ચ કરવામાં આવ્યું. 

મળતી માહિતી મુજબ ઈસરોએ આજે સવારે  PSLV-C52 મિશન હેઠળ 3 સેટેલાઈટ લોન્ચ કર્યા છે. જેમાંથી એક EOS-04 રડાર ઈમેજિંગ છે. જેને કૃષિ, વાનિકી, અને વૃક્ષારોપણ, માટીના ભેજ અને જળ વિજ્ઞાન તથા પૂર અને હવામાનની સ્થિતિઓ સંબંધિત હાઈ રિઝોલ્યૂશન ફોટા મોકલવા માટે ડિઝાઈન કરાયો છે. 

PSLV-C52 દ્વારા ધરતીનો પર્યવેક્ષણ ઉપગ્રહ (EOS)- 04 અંતરિક્ષમાં મોકલવામાં આવ્યો છે. અત્રે જણાવવાનું કે ઈસરોએ જાણકારી આપી હતી કે તે સોમવારે પોતાની યૂટ્યુબ ચેનલ પર PSLV-C52 સેટેલાઈટના લોન્ચિંગનું સીધુ પ્રસારણ કરશે. આ સાથે જ તેનું લાઈવ સ્ટ્રિમિંગ સોમવારે સવારે 5.30 વાગ્યાથી શરૂ થશે. 

#WATCH | Indian Space Research Organisation launches PSLV-C52/EOS-04 from Satish Dhawan Space Centre, Sriharikota

(Source: ISRO) pic.twitter.com/g92XSaHP9r

— ANI (@ANI) February 14, 2022

ઈસરોના જણાવ્યાં મુજબ આ સેટેલાઈટ લોન્ચિંગથી ઈસરોની યોજનાઓને ગતિ મળશે. આ સાથે જ અંતરિક્ષ એજન્સીનું લક્ષ્ય ચંદ્રયાન-3 અને ગગનયાન સહિત 19 સેટેલાઈટ લોન્ચ કરવા પર છે. એજન્સીના જણાવ્યાં મુજબ પૃથ્વી અવલોકન સેટેલાઈટ EOS-04 સાથે બે નાના સેટેલાઈટ પણ PSLV-C52 રોકેટ દ્વારા સફળતાપૂર્વક લોન્ચ કરવામાં આવ્યા છે. આ સેટેલાઈટ પોતાની કક્ષામાં સ્થાપિત થઈ ગયા છે. 

ઈસરો આ વર્ષની શરૂઆતના ત્રણ મહિનાની અંદર પાંચ લોન્ચિંગની તૈયારીમાં છે. પહેલું EOS-04, ત્યારબાદ PSLV-C53 પર OCEANSAT-3 અને INS-2B માર્ચમાં લોન્ચ કરાશે. એપ્રિલમાં SSLV-D1 માઈક્રોસેટનું લોન્ચિંગ થશે. જો કે કોઈ પણ લોન્ચિંગની નિર્ધારિત તારીખ છેલ્લી ઘડી સુધી બદલાઈ શકે છે. કારણ કે કોઈ પણ લોન્ચિંગ પહેલા અનેક પ્રકારના માપદંડો જોવા પડતા હોય છે.