ભગવંત માન 16 માર્ચે લેશે મુખ્યમંત્રી પદની શપથ, અમૃતસરમાં યોજાશે મેગા રોડ શો

નવી દિલ્હી: પંજાબ વિધાનસભા ચૂંટણીમાં ઐતિહાસિક જીત નોંધાવ્યા બાદ આપના મુખ્યમંત્રી ઉમેદવાર ભગવંત માને દિલ્હીમાં પાર્ટીના સંયોજક અરવિંદ કેજરીવાલ સાથે મુલાકાત કરી. ભગવંત માને અરવિંદ કેજરીવાલને 16 માર્ચે યોજાનાર શપથ ગ્રહણ સમારોહમાં સામેલ થવા માટે આમંત્રણ આપ્યું છે અને પગે લાગીને તેમના આર્શિવાદ લીધા હતા. 

અમૃતસરમાં યોજાશે મેગા રોડ શો
શપથગ્રહણ પહેલા વિજયની ઉજવણી કરવા માટે 13 માર્ચે અરવિંદ કેજરીવાલ અને ભગવંત માન અમૃતસરમાં રોડ શો કરશે. આ રોડ શોનો હેતુ પંજાબની જનતાનો આભાર વ્યક્ત કરવાનો છે. ચૂંટણી પહેલા જ કેજરીવાલે AAP પાર્ટી તરફથી ભગવંત માનને મુખ્યમંત્રી પદના ઉમેદવાર જાહેર કર્યા હતા અને એવામાં હવે તેઓ પંજાબના આગામી મુખ્યમંત્રી હશે.

ભગવંત માન સાથે મુલાકાત બાદ કેજરીવાલે એક ટ્વીટ કરીને જણાવ્યું કે ભગવંત માને તેમને શપથ ગ્રહણમાં આવવા માટે આમંત્રણ આપ્યું છે. સાથે જ તેમણે કહ્યું છે કે મુખ્યમંત્રી તરીકે ભગવંત માન પંજાબના લોકોની આશાઓ પર ખરા ઉતરશે. 

मेरा छोटा भाई भगवंत मान पंजाब के मुख्यमंत्री पद की शपथ लेगा। आज वे शपथ ग्रहण का न्यौता देने मेरे घर आए। मुझे पूरा भरोसा है कि भगवंत एक मुख्यमंत्री के तौर पर पंजाब के लोगों की हर उम्मीद को पूरा करेंगे। pic.twitter.com/u2JoH1ZKtH

— Arvind Kejriwal (@ArvindKejriwal) March 11, 2022

આપના વાવાઝોડામાં ઉડ્યા રાજકીય પક્ષો 
પંજાબના ચૂંટણી પરિણામોમાં આ વખતે આપે તમામ રાજકીય કિલ્લાઓને ધ્વસ્ત કરતાં બમ્પર જીત નોંધાવી છે. આપે 117 વિધાનસભા બેઠકોમાંથી 92 બેઠકો જીતી છે. ભગવંત માન ધુરી બેઠક પરથી 58,206 મતોના જંગી માર્જિનથી જીત્યા છે. 'આપ'ના વાવાઝોડામાં મુખ્યમંત્રી ચરણજીત સિંહ ચન્નીથી લઈને નવજોત સિંહ સિદ્ધુ, અમરિંદર સિંહ, પ્રકાશ સિંહ બાદલ અને સુખબીર બાદલ પણ પોતાની સીટ બચાવી શક્યા નથી.