Crime News: പോക്സോ കേസ് പ്രതി കോടതിയിൽ നിന്നും രക്ഷപ്പെട്ടു; ബെം​ഗളൂരുവിൽ നിന്നും പിടികൂടി പോലീസ്

പ്രതിയുടെ അമ്മയുടെ മൊബൈൽ കേന്ദ്രീകരിച്ചു നടത്തിയ അന്വേഷണമാണ് പ്രതിയെ പിടികൂടാൻ സഹായകമായത്.

കൊല്ലം: കോടതിയിൽ നിന്നും രക്ഷപെട്ട പോക്സോ കേസ് പ്രതിയെ ബാംഗ്ലൂരിൽ നിന്നും അറസ്റ്റ് ചെയ്തു. കൊല്ലം അഡീഷണൽ സെഷൻസ് 
കോടതി രണ്ടിൽ വച്ച് ജഡ്‌ജി മൊഴിയെടുക്കുന്നതിനിടെയാണ് രക്ഷപ്പെട്ടത്. പരവൂർ കൂനയിൽ തോട്ടുംകര തൊടിയിൽ വീട്ടിൽ അഭിജിത്തിനിയാണ് പോലീസ് ബെം​ഗളൂരുവിൽ നിന്നും പിടികൂടിയത്. കോടതിയുടെ മതിൽ ചാടിയ പ്രതി ആസൂത്രണ സമിതി ഓഫീസിനുള്ളിൽ കൂടി കൊട്ടാരക്കുളം ഗണപതി ക്ഷേത്രം, ടി.ഡി റോഡുവഴിയാണ് രക്ഷപ്പെട്ടത്. കൊല്ലത്ത് നിന്നും റെയിൽവേ പാളത്തിലൂടെ പരവൂരിൽ എത്തിയ പ്രതി വീട്ടിൽ എത്തി ബാഗുമായി ട്രെയിനിൽ പരവൂർ റെയിൽവേ സ്റ്റേഷനിൽ നിന്നും ട്രയിൻ കയറി രക്ഷപെടുകയായിരുന്നു.

തുടർന്ന് പോലീസ് പ്രതിയുടെ അമ്മയുടെ മൊബൈൽ കേന്ദ്രീകരിച്ചു നടത്തിയ അന്വേഷണത്തിൽ പ്രതി വിവിധ സ്ഥലങ്ങളിൽ നിന്നും ഫോൺ ചെയ്തതായി കണ്ടെത്തി. തുടർന്ന് ബാംഗ്ലൂരിൽ വച്ച് റെയിൽവേ പോലീസ് പ്രതിയെ പിടികൂടി ശ്രീരാമപുരം പോലീസിന് കൈമാറി. കൊല്ലത്ത് നിന്നുള്ള സ്പെഷ്യൽ സ്ക്വാഡ് എത്തി ഇയാളെ തിരികെ കൊണ്ടുവന്നു.

പ്രായപൂർത്തിയാകാത്ത പെൺകുട്ടികളോട് അശ്ലീലം പറഞ്ഞ ഇയാളെ കഴിഞ്ഞ മാസം 2നാണ് പരവൂർ പൊലീസ് അറസ്റ്റ് ചെയ്തത്. ജുഡീഷ്യൽ കസ്റ്റഡിയിൽ ജില്ലാ ജയിലിൽ കഴിഞ്ഞ പ്രതിയെ മറ്റൊരു പോക്സോ കേസിൽ അറസ്റ്റ് ചെയ്യാനാണ് കഴിഞ്ഞ മാസം 16ന് കോടതിയിൽ ഹാജരാക്കിയത്.