close

News WrapGet Handpicked Stories from our editors directly to your mailbox

ഏ​കാം​ഗ സ​ർ​ക്കാരിന്‍റെ ഭാവി ഇന്നറിയാം; ഗവര്‍ണര്‍ക്ക് നല്‍കിയ കത്തുകള്‍ പരിശോധിക്കും

ക​ർ​ണാ​ട​ക​യി​ല്‍ രാഷ്ട്രീയ നാടകങ്ങള്‍ക്ക് ശേഷം അധികാരത്തിലേറിയ യെദ്യൂരപ്പയുടെ ഏ​കാം​ഗ സ​ർ​ക്കാ​രിന്‍റെ ആയുസ്സ് സു​പ്രീം​കോ​ട​തി ഇ​ന്നു തീ​രു​മാനിക്കും. 

Updated: May 18, 2018, 10:16 AM IST
ഏ​കാം​ഗ സ​ർ​ക്കാരിന്‍റെ ഭാവി ഇന്നറിയാം; ഗവര്‍ണര്‍ക്ക് നല്‍കിയ കത്തുകള്‍ പരിശോധിക്കും

ന്യൂ​ഡ​ൽ​ഹി: ക​ർ​ണാ​ട​ക​യി​ല്‍ രാഷ്ട്രീയ നാടകങ്ങള്‍ക്ക് ശേഷം അധികാരത്തിലേറിയ യെദ്യൂരപ്പയുടെ ഏ​കാം​ഗ സ​ർ​ക്കാ​രിന്‍റെ ആയുസ്സ് സു​പ്രീം​കോ​ട​തി ഇ​ന്നു തീ​രു​മാനിക്കും. 

ബി.​എ​സ്.​ യെദ്യൂരപ്പ സ​ർ​ക്കാ​രി​നെ​തി​രെ കോ​ൺ​ഗ്ര​സും ജെ​ഡി​എ​സും സ​മ​ർ​പ്പി​ച്ച ഹ​ർ​ജി​യി​ൽ സു​പ്രീം​കോ​ട​തി എ​ന്തു​നി​ല​പാ​ട് എ​ടു​ക്കു​മെന്നാണ് ഇന്ന് രാ​ജ്യം ഉ​റ്റു​നോ​ക്കു​ന്നത്. 

കൂടാതെ മ​ന്ത്രി​സ​ഭ ഉണ്ടാ​ക്കാ​ൻ അ​വ​കാ​ശവാദ​മു​ന്ന​യി​ച്ചു യെദ്യൂരപ്പ 15നും 16നും ഗ​വ​ർ​ണ​ർ​ക്ക് ന​ല്കി​യ ക​ത്തു​ക​ളും രാ​വി​ലെ 10.30ന് ​കോ​ട​തി പ​രി​ശോ​ധി​ക്കും. യെദ്യൂരര​പ്പ​യെ സ​ർ​ക്കാ​ർ രൂ​പീ​ക​രി​ക്കാ​ൻ ഗ​വ​ർ​ണ​ർ വി​ളി​ച്ച​തു ശ​രി​​യോ എ​ന്ന് അ​തി​നു​ശേ​ഷം സുപ്രീം കോടതി തീ​രു​മാ​നി​ക്കും.

കഴിഞ്ഞ ദിവസം പുലര്‍ച്ചെ മൂന്നുമണി വരെ നീണ്ട വാദത്തിനൊടുവിലാണ് ഇന്നലെ ബി എസ് യെദ്യൂരപ്പയെ സത്യപ്രതിജ്ഞ ചെയ്യാൻ സുപ്രീംകോടതി അനുവദിച്ചത്.

കത്തുകൾ അറ്റോർണി ജനറലോ യെദ്ദ്യുരപ്പയോ ആണു ഹാജരാക്കേണ്ടത്. ഗവര്‍ണര്‍ വിവേചനാധികാരം ഉപയോഗിച്ചത് നീതിയുക്തമല്ലെന്ന് തെളിഞ്ഞാല്‍ യെദ്യൂരപ്പ മുഖ്യമന്ത്രിയായ നടപടി തന്നെ കോടതി റദ്ദാക്കിയേക്കാം.

മുഖ്യമന്ത്രിയായി സത്യപ്രതിജ്ഞ ചെയ്ത സാഹചര്യത്തിൽ നിയമസഭയ്ക്കുള്ളിൽ ഭൂരിപക്ഷം തെളിയിക്കാൻ അവസരം നൽകണമെന്ന യെദ്യൂരപ്പയുടെ വാദം അംഗീകരിച്ചാലും 15 ദിവസം എന്ന ഗവര്‍ണര്‍ നൽകിയ സമയം സുപ്രീംകോടതിയ്ക്ക് വെട്ടിക്കുറയ്ക്കാനും സാധ്യതയുണ്ട്. 

കാര്‍ഷിക കടം എഴുതിത്തള്ളൽ, പൊലീസ് ഉദ്യോഗസ്ഥരുടെ സ്ഥലം മാറ്റം, ആംഗ്ലോ ഇന്ത്യൻ എംഎൽഎയുടെ നാമനിര്‍ദ്ദേശം തുടങ്ങി യെദ്യൂരപ്പ കൈക്കൊണ്ട തീരുമാനങ്ങൾ നിലനിൽക്കുമോയെന്നും കോടതി വ്യക്തമാക്കും. 

കേസിൽ കക്ഷി ചേരാൻ അനുവദിക്കണമെന്നും ഭരണഘടന നല്‍കുന്ന അധികാരത്തെ അപമാനിക്കുന്ന നടപടിയാണ് ഗവര്‍ണര്‍ സ്വീകരിച്ചിരിക്കുന്നതെന്നും ചൂണ്ടിക്കാട്ടി രാം  ജത്മലാനി നല്‍കിയ ഹരിജിയും ഇന്ന് കോടതി പരിഗണിക്കും. 

നിയമസഭയില്‍ ഏറ്റവും വലിയ ഒറ്റക്കക്ഷിയാണെങ്കിലും കേവലഭൂരിപക്ഷത്തിന് ബി.ജെ.പി.ക്ക് എട്ട് അംഗങ്ങളുടെ കുറവുണ്ട്. ഇതിനായി കോണ്‍ഗ്രസ്, ജനതാദള്‍-എസ് എം.എല്‍.എ.മാരെ സ്വന്തം പാളയത്തിലെത്തിക്കാനുള്ള ശ്രമമാണ് ബിജെപി നടത്തുന്നത്. ഈ നീക്കത്തിന് തടയിടാനാണ് കോണ്‍ഗ്രസ് - ജെഡിഎസ് ശ്രമം.