Wayanad Wild Animal attacK: വന്യജീവി ആക്രമണം: ആശ്രിതർക്ക് നൽകുന്ന നഷ്ടപരിഹാരം വൈകരുത്; രാഹുൽ ഗാന്ധി

Rahul Gandhi: വയനാട്ടിലെ മെഡിക്കൽ കോളേജ് ഉൾപ്പെടെയുള്ള പ്രശ്നങ്ങളെ കുറിച്ചും രാഹുൽ ഗാന്ധി ചൂണ്ടിക്കാട്ടി.

കൽപ്പറ്റ: വന്യജീവി ആക്രമണത്താൽ കൊല്ലപ്പെടുന്നവരുടെ  കുടുംബാംഗങ്ങൾക്ക് നൽകുന്ന നഷ്ടപരിഹാരത്തിൽ കാലതാമസം വരുത്തരുതെന്ന് സംസ്ഥാന സർക്കാരിനോട് ആവശ്യപ്പെട്ട് വയനാട് എംപിയായ രാഹുൽ ഗാന്ധി. വയനാട്ടിൽ വന്യജീവി ആക്രമണത്തെ തുടർന്ന് കൊല്ലപ്പെട്ടവരുടെ വീടുകൾ സന്ദർശിച്ച ശേഷം മാധ്യമങ്ങളോട് പ്രതികരിക്കുകയായിരുന്നു അദ്ദേഹം. വയനാട്ടിൽ വന്യജീവി ആക്രമണങ്ങൾ ഒരു തുടർക്കഥയായി മാറുന്ന സാഹചര്യത്തിലും വിഷയത്തിൽ സംസ്ഥാന സർക്കാർ വേണ്ട പരിഗണന നൽകുന്നില്ലെന്നും പാവപ്പെട്ട വീടുകളിലെ മനുഷ്യരാണ് മരിച്ചതൊന്നും അവർക്ക് അർഹതപ്പെട്ട പടം ഉടൻ എത്തിക്കേണ്ടത് സർക്കാരിന്റെ ചുമതലയാണെന്നും രാഹുൽ വ്യക്തമാക്കി.

 ഓരോ കുടുംബത്തിനും ഇത്തരം വന്യജീവി ആക്രമണത്തിലൂടെ അവരുടെ കുടുംബ നാഥനെയാണ് നഷ്ടപ്പെടുന്നത്. ആ സാഹചര്യത്തിൽ എത്രയും പെട്ടെന്ന് നഷ്ടപരിഹാരം കൈമാറുക എന്നത് അത്യാവശ്യമായ കാര്യമാണ്.  വയനാട്ടിലെ മെഡിക്കൽ കോളേജ് ഉൾപ്പെടെയുള്ള പ്രശ്നങ്ങളെ കുറിച്ചും രാഹുൽ ഗാന്ധി ചൂണ്ടിക്കാട്ടി. വയനാട്ടിൽ എത്തിയത് മുതൽ മുഖ്യമന്ത്രിയെ ബന്ധപ്പെടാൻ ശ്രമിക്കുന്നുണ്ടെങ്കിലും അദ്ദേഹത്തെ ഫോണിൽ പോലും ലഭിക്കുന്നില്ല എന്നും രാഹുൽ ഗാന്ധി പറഞ്ഞു. എന്നാൽ അദ്ദേഹവുമായി ബന്ധപ്പെടാൻ ഇനിയും ശ്രമിക്കുമെന്നും വയനാട്ടിലെ സ്ഥിതിഗതികളെക്കുറിച്ച് അദ്ദേഹവുമായി ചർച്ച നടത്തുമെന്നും രാഹുൽ ഗാന്ധി വ്യക്തമാക്കി.. അതേസമയം ദേശീയ രാഷ്ട്രീയ വിഷയങ്ങളെക്കുറിച്ചുള്ള മാധ്യമങ്ങളുടെ ചോദ്യങ്ങൾക്ക് രാഹുൽഗാന്ധി മറുപടി നൽകിയില്ല.