Ganpati Visarjan 2024 in Mumbai Celebration Live Updates: 10 दिवसांचा पाहुणचार स्वीकारल्यानंतर लाडका बाप्पा आता सर्वांचा निरोप घेत पुढच्या प्रवासासाठी निघाला. उत्सवाच्या या माहोलानंतर आता सर्वत्र कल्ला असणारं आणि गजबजाटाचं वातावरण शमून घड्याळाच्या काट्यावर धावणारे मुंबईकर आता पुन्हा एकदा त्यांच्या दिनचर्येमध्ये व्यग्र होतील. मनात आस असेल ती म्हणजे बाप्पा पुढच्या वर्षी येणार तेव्हा त्यांचं स्वागत कसं करायची याबाबतची आणि इच्छा असेल ती बाप्पानं आपल्यावर वरदहस्त कायम ठेवावा याची... गणपती बाप्पा मोरया!!!
18 Sep 2024, 11:02 वाजता
Mumbai Ganapati Visarjan 2024 Live Updates: लालबागच्या राजामागोमाग इतरही गणपतींचं विसर्जन
अनंत चतुर्दशच्या दुसऱ्या दिवशी गिरगाव चौपाटीवर तब्बवल 24 तासांनंतर लालबागच्या राजाचं विसर्जन करण्यात आलं. त्यानंतर इथं आलेल्या इतरही सार्वजनिक गणेशमूर्तींचं विसर्जन पार पडलं. यावेळी पालिका प्रशासन, जीवरक्षक दल आणि कोळी बांधवांनी इथं आलेल्या गणेशोत्सव मंडळांना सहकार्य केल्याचं पाहायला मिळालं.
18 Sep 2024, 10:31 वाजता
Mumbai Ganapati Visarjan 2024 Live Updates: 24 तासांच्या विसर्जन मिरवणुकीनंतर लालबागच्या राजाचं विसर्जन
लाखो भाविक, त्यांच्या मनीच्या भावना आणि असंख्य प्रार्थना अशा वातावरणात लालबागच्या राजाचा विसर्जन सोहला पार पडला. तब्बल 24 तासांनंतर श्रींच्या मूर्तीचं विसर्जन गिरगाव चौपाटी येथील अथांग समुद्रात करण्यात आलं. यावेळी पुढच्या वर्षी लवकर या असे जयघोष भाविकांनी करत बाप्पाला निरोप दिला.
18 Sep 2024, 10:08 वाजता
Mumbai Ganapati Visarjan 2024 Live Updates: लालबागच्या राजाला कोळी बांधवांची सलामी
कोळी बांधवांनी ब्रास बँड आणि बोटींच्या माध्यमातून भर समुद्रात लालबागच्या राजाला सलामी दिली. ज्यानंतर राजा तराफ्यावर बसून विसर्जनास सज्ज झाला. यावेळी गणपती बाप्पा मोरयाच्या जयघोषानं संपूर्ण परिसर निनादून निघाला.
18 Sep 2024, 08:35 वाजता
Mumbai Ganapati Visarjan 2024 Live Updates: अद्यापही अनेक गणेशमूर्ती विसर्जनाच्या प्रतीक्षेत
मुंबईतील गिरगाव चौपाटीवर एकिकडे लालबागच्या राजाचं विसर्जन सुरू असतानाच दुसरीकडे अद्यापही अनेक गणेश मूर्ती विसर्जनासाठी प्रतीक्षेत असून, त्याकरता मोठ्या प्रमाणात मंडळाचे कार्यकर्ते आणि गणेशभक्तांनी इथं गर्दी केल्याचं पाहायला मिळत आहे.
18 Sep 2024, 06:55 वाजता
Mumbai Ganapati Visarjan 2024 Live Updates: दिवस बदलला पण, विसर्जन मिरवणुका सुरूच
मानाच्या लालबाग राजाची विसर्जन मिरवणूक अद्यापही सुरुच आहे. साधारण 20 ते 21 तासांपासून लालबागच्या राजाची मिरवणूक सुरूच असून गणेशभक्तांचा उत्साह तसूभरही कमी झालेला नाही.
18 Sep 2024, 06:43 वाजता
Mumbai Ganapati Visarjan 2024 Live Updates: आतापर्यंत किती गणेशमूर्तींचं विसर्जन?
श्रीगणेश मूर्ती 11 व्या दिवसाच्या विसर्जनाचा अहवाल काल मध्य रात्री 12 वाजेपर्यंत :
सर्वजनिक - 2593
घरगुती-26577
गौरी - ४९४
एकूण = 29364
त्यापैकी कृत्रिम तलावांमध्ये विसर्जन:
सर्वजनिक - 454
घरगुती – १०४७५
गौरी – ४७
एकूण = 10976
विसर्जनाच्या वेळी कोणताही अनुचित प्रकार घडला नाही.
17 Sep 2024, 21:51 वाजता
लालबागच्या राजाला निरोप देण्यासाठी लाखो भक्तांची गर्दी
मुंबईमधील लालबागच्या राजाला निरोप देण्यासाठी लाखो भक्तांनी गर्दी केली आहे. ही शान कोणाची लालबागच्या राजाची या जयघोषात लाडक्या गणरायाला निरोप देण्यात येत आहे.
17 Sep 2024, 19:19 वाजता
मुंबईत आतापर्यंत 7574 गणेश मूर्तींचं विसर्जन
मुंबईत आतापर्यंत 7574 गणेश मूर्तींचं विसर्जन झाल्याची माहिती मुंबई पालिकेकडून देण्यात आली आहे. या, सार्वजनिक गणपती - 300, घरगुती गणपती - 7227, गौरी गणपती - 47 यांचा समावेश आहे.
17 Sep 2024, 17:28 वाजता
लालबागच्या राजावर श्रॉफ बिल्डिंगकडून पुष्पवृष्टी
लालबागच्या राजावर श्रॉफ बिल्डिंगकडून पुष्पवृष्टी, श्रॉफ बिल्डिंग समितीकडून पुष्पवृष्टीची परंपरा आहे. या वर्षी श्रॉफ बिल्डिंगकडून एक हजार किलो फुलांची ऑर्डर देण्यात आली आहे.
17 Sep 2024, 16:23 वाजता
चिंचपोकळीचा चिंतामणी गिरगावकडे रवाना
चिंचपोकळीचा चिंतामणी मुख्य प्रवेशद्वारातून बाहेर पडत आहे. यानंतर तो लालबागच्या पुलाखालून चिंचपोकळी पूलावरून गिरगावकडे रवाना होईल
