केदारनाथ येथील अंगावर काटा आणणारी दृश्य

www.24taas.com, झी मीडिया, उत्तराखंड
आभाळ फाटल्याने झालेल्या या महाप्रलयात केवळ केदारनाथचे मंदिर आणि त्यातील शिवलिंग अजूनही तसेच आहे. त्याच्या आजुबाजूचा परिसर मात्र पूर्णपणे विखरून गेलाय. त्याच्या चोहोबाजूस पसरलेले छिन्नविछिन्न देह अंगावर काटा आणतात. उत्तराखंडचे कृषिमंत्री हरक सिंग रावत यांनी पाहणी झाल्यानंतर असं सांगितलं की, आम्ही अत्यंत कठीण परिस्थितीत हेलिकॉप्टरने त्याठिकाणी उतरलो. त्याठिकाणचे दृश्य फारच विदारक होते. केदारनाथ परिसराच्या चारही बाजूस विध्वंस आणि हानीच दिसत होती.

प्रशासनाकडून बद्रिनाथ मंदिरापासून काही अंतरावर हेलिकॉप्टर उतरवण्याचा प्रयत्न केला जातोय. मंत्र्यांनी दिलेल्या माहितीनुसार तिथे साधारण २५० लोक अडकलेले आहेत. गौरीकुंडात अजून ८००० ते १०,००० लोक अडकलेले आहेत. आम्ही वृद्ध आणि आजारी लोकांना सुरक्षितस्थळी आणण्याचे काम करत आहोत. सेना आणि आयटीबीपी चे लोक बाकीच्या लोकांना दोरीच्या मदतीने बाहेर काढण्याचा प्रयत्न करत आहेत.असे रावत म्हणाले. त्याचप्रमाणे मंत्र्यांनी अशीही माहिती दिली की, सेना आणि आयटीबीपीच्या लोकांनी आतापर्यंत २००० लोकांना वाचवले आहे.