लोकपालसाठी मुंबई अण्णामय

झी २४ तास वेब टीम, मुंबई

अण्णांना समर्थन देण्यासाठी रणमैदानावर देशाच्या कानाकोप-यातून लोक जमा होतायत. यामध्ये बच्चे कंपनीही मागे नाही.  जुहूतून महात्मा गांधी पुतळा येथून रॅलीला सुरूवात झाली.  जुहूतून अण्णा हजारे यांची ट्रकमधून रॅली सुरू झाल्यानंतर प्रचंड जनसमुदाय जमला होता. त्यामुळे लोकपालसाठी मुंबईत अण्णामय वातावरण दिसून आले आहे.

जनलोकपाल बिलासाठी आज मुंबईत अण्णांचे  तीन दिवस उपोषण असणार आहे.  जोपर्यंत जनलोकपालमधील आमच्या मागण्या मान्य होत नाही, तोपर्यंत जनलोकपाल बिलासाठी अखेरच्या श्वासापर्यंत लढत राहणार असल्याचे ज्येष्ठ समाजसेवक अण्णा हजारे यांनी म्हटले आहे. अण्णांबरोबर अरविंद केजरीवाला, किरण बेदी करणार उपोषण करणार आहेत.

अण्णांच्या आंदोलनाच्या पार्श्वभूमीवर आयबीनं मुंबई पोलिसांना अलर्ट राहण्याचा इशारा दिलाय. अण्णांच्या आंदोलनाच्या ठिकाणी प्लास्टिक बॅग्जना मज्जाव करण्यात आलाय. दरम्यान,  लोकपाल विधेयक मंजूर करण्यासाठी आजपासून संसदेत तीन दिवस चर्चा होणार आहे.  लोकपालवर दुपारी २ वाजचा संसदेत चर्चा  होणार  आहे. या विधेयकामधल्या तरतुदींवरून सत्ताधारी आणि विरोधकांमध्ये संघर्ष होण्याची चिन्हे आहेत. सरकारने अण्णांच्या चारही मागण्या फेटाळल्यात.

विरोधकांनी  ५७ दुरूस्त्या सुचविल्या आहेत.  या दुरूस्त्यांचा आकडा १०० वर जाणार आहे. मात्र, सरकारकडून लोकपाल बिला

त दुरुस्ती करण्यात येणार नसल्याची माहिती सूत्रांनी दिलीय. मात्र व्हिसल ब्लोअर आणि न्यायालयीन उत्तरदायित्व बिलावर सरकारकडून विचार होण्याची शक्यता  वर्तवली जातेय. पंतप्रधान डॉ.मनमोहन सिंग सरकारची भूमिका संसदेत मांडणार आहेत. काँग्रेसकडून संसदेत आज शशी थरुर पहिले वक्ते असतील. दुसरीकडे भाजपनं विधेयकांमध्ये काही दुरुस्त्या सुचवल्यात.  सशक्त लोकपालसाठी आम्ही सुचवलेल्या दुरुस्त्या स्विकारल्याच पाहिजेत अशी भूमिका भाजपनं घेतलीय. डाव्या पक्षांनी काही दुरुस्त्या सुचवल्यात. निरीक्षकांच्या मते लोकसभेत संमती मिळवणं सरकारला फारसं कठीण जाणार नाही. मात्र राज्यसभेत सरकारला विरोधकांना विश्वासात घ्यावं लागेल. विधेयक संमत होण्यासाठी विरोधकांनी दुरुस्त्या न सुचवता सहकार्य करावं असं आवाहन संसदीय कामकाज मंत्री पवनकुमार बन्सल यांनी केलंय.

अण्णांच्या आंदोलनाला पाठिंबा देणार असल्याचं मुस्लिम संघटनांनी जाहीर केलंय. काँग्रेसनं अण्णांच्या आंदोलनाला वेगळा रंग देण्याचा प्रयत्न केला असला तरी काँग्रेसच्या भूलथापांनी भुलणार नाही आणि अण्णांच्या आंदोलनालाच पाठिंबा देऊ, अशी ग्वाही मुस्लीम संघटनांनी दिलीय. अण्णांच्या आंदोलनाला जास्तीत जास्त पाठिंबा मिळावा, यासाठी अण्णांचे सहकारी अरविंद केजरीवाल यांनी क्रॉफर्ड मार्केटमध्ये काही मुस्लिम संघटनांचे प्रतिनिधी आणि NGO च्या सदस्यांची भेट घेतली. या सगळ्यांनी अण्णांच्या आंदोलनाला पाठिंबा द्यावा, यासंदर्भात केजरीवाल यांनी चर्चा केली.