हॅपी बर्थडे फेसबुक!

www.24taas.com, झी मीडिया, लॉस एन्जिल्स
सोशल नेटवर्किंग वेबसाईट फेसबुक या आठवड्यात आपला दहावा वाढदिवस साजरा करत आहे. या दशकात `फेसबुक`नं अनेक उतार-चढाव पाहिलेत. त्याचप्रमाणे तरुणवर्गात अत्यंत लोकप्रियही ही वेबसाईट ठरलीय.
जगभरात याचे १.२ अरबपेक्षा जास्त वापरकर्ते आहेत. फेसबुकचा गेल्या काही वर्षांतील वाढत्या संख्येचा आलेख लक्षात घेता `फेसबुक` बंद होण्याची शक्यता कमी असल्याचं दिसतंय.
`फेसबुक` या कंपनीची स्थापना मार्क झुकरबर्ग यानं फेब्रुवारी २००४ रोजी केली होती. हावर्ड विश्वविद्यालयाच्या या विद्यार्थ्यानं वेगवेगळ्या लोकांमध्ये आपल्या अनुभवांना शेअर करण्यासाठी एक मंच तयार केला होता... हीच होती फेसबुक वेबसाईटची सुरुवात.
`मैत्री`ची एक वेगळीच नवी भाषा फेसबुकमुळे प्रस्थापित झाली... फेसबुक मैत्री हा शब्दही वेगवेगळ्या कारणांमुळे चांगलाच गाजला. `फेसबुक`मुळे कोणतीही व्यक्ती दुसऱ्या कोणत्याही व्यक्तीला फॉलो करून त्याचा मित्र बनू शकत होता. २०१३ साली फेसबुकनं ७.८७ अरब डॉलरची कमाई केली होती. ज्यामध्ये १.५ अरब डॉलर निव्वळ नफा होता.
`फेसबुक`मुळेच जगभरातील सगळ्यात श्रीमंत व्यक्तींच्या यादीत सहभागी झालेला मार्क झुकरबर्ग मे महिन्यात आपला ३० वा वाढदिवस साजरा करणार आहे. एकीकडे फेसबुक घरा-घरांत लोकप्रिय होताना दिसतंय. तिथंच अमेरिकेतली युवा पिढी मात्र याच फेसबुकपासून दूर जाताना दिसतेय. ते `फेसबुक`मध्ये काहीतरी नवीन शोधण्याचा प्रयत्न करताना दिसतायत.
एका रिपोर्टनुसार, जानेवारी २०११ पासून जानेवारी २०१४ या कालावधीत १३ ते १७ वर्ष वयोगटातील ३० लाखांपेक्षा जास्त वापरकर्त्यांनी आपलं `फेसबुक` अकाऊंट बंद केलंय. १८ ते २४ वर्षांपर्यंतच्या तरुणांमध्येही हीच गोष्ट आढळून आलीय.