IPL 2019: ...आणि धोनी आजींना भेटायला ड्रेसिंग रूममधून बाहेर आला

मुंबई : रोहित शर्माच्या मुंबईने धोनीच्या चेन्नईचा ३७ रननी दणदणीत पराभव केला. वानखेडे स्टेडियमवर खेळवण्यात आलेल्या या सामन्यामध्ये फक्त मुंबईच नाही तर धोनीला चिअर करण्यासाठीही त्याचे फॅन आले होते. अशाच एका वृद्ध आजींना धोनी भेटायला गेला. आयपीएलने हा व्हिडिओ सोशल नेटवर्किंगवर शेअर केला आहे.

मुंबई आणि चेन्नईमधली मॅच पाहायला आलेल्या या आजींनी बरोबर एक पोस्टर आणलं होतं. 'मी इकडे फक्त धोनीसाठी आली आहे', असं या पोस्टरवर लिहिण्यात आलं होतं. यानंतर धोनीनेही आजींची इच्छा पूर्ण केली. ड्रेसिंग रूममधून धोनी आजींना भेटायला आला. आजींची भेट घेत असताना एक मुलगीही धोनीजवळ आली आणि तिने धोनीचे पाय धरले.

आयपीएलने त्यांच्या अधिकृत ट्विटर अकाऊंटवर टाकलेल्या या व्हिडिओमध्ये आजींसोबत आलेल्या मुलीने धोनीकडे तिचा मोबाईल दिला आणि सेल्फी काढण्याची विनंती केली. धोनीनेही या दोघींची इच्छा पूर्ण केली आणि सेल्फी काढला. मुलीने तिच्यासोबत आणलेल्या चेन्नईच्या जर्सीवरही धोनीने सही दिली.

Captain cool, @msdhoni humble

Heartwarming to see this gesture from the legend in Mumbai @ChennaiIPL #VIVOIPL pic.twitter.com/6llHlenIzL

— IndianPremierLeague (@IPL) April 4, 2019

सुरक्षा भेदून धोनीला भेटायला आलेले चाहते आपण अनेक वेळा बघितले आहेत. मैदानात आलेल्या या चाहत्यांना धोनी कधीही नाराज करत नाही. मैदानात आलेल्या चाहत्यांसोबत धोनीला पकडापकडी खेळतानाही आपण पाहिलं आहे. यावेळी मात्र खुद्द धोनीच आजींना भेटायला ड्रेसिंग रूममधून बाहेर आला.