लंडनमध्ये कोरोना नियंत्रणाबाहेर, आपात्कालीन स्थितीची घोषणा

लंडन : ब्रिटनमध्ये कोरोनाचा कहर सुरु आहे. वृत्तसंस्था एपीच्या वृत्तानुसार, गेल्या 24 तासात 1,325 लोकांचा मृत्यू यूकेमध्ये झाला आहे. साथीच्या रोगाचा प्रादुर्भाव झाल्यानंतर ही मृतांची सर्वात मोठी संख्या आहे. वृत्तसंस्था रॉयटर्सच्या वृत्तानुसार लंडनमध्ये आपत्कालीन संकटाची घोषणा करण्यात आली आहे. कोरोना संसर्गाची प्रकरणे आटोक्याच्या बाहेर गेली आहेत. धोका लक्षात घेता ब्रिटनने कोविड-१९ चाचणी भारतासह जगातील सर्व देशातील लोकांसाठी अनिवार्य केली आहे.

लंडनमधील नवीन कोरोना व्हायरसचा प्रसार अधिक झपाट्याने होत आहे. लंडनचे महापौर सादिक खान यांनी शुक्रवारी याची 'मोठी घटना' असे वर्णन केले. वृत्तसंस्था रॉयटर्सच्या म्हणण्यानुसार लंडनमध्ये राहणारा प्रत्येक 30 वा व्यक्ती कोरोना पॉझिटिव्ह आहे. लंडनमध्ये आता संक्रमित झालेल्यांची संख्या १,००,००० लोकांच्या तुलनेत एक हजाराहून अधिक आहे. 30 डिसेंबर ते 6 जानेवारी दरम्यान लंडनमध्ये रुग्णालयातील एकूण रुग्णांची संख्या 27 टक्क्यांनी वाढली आहे.

वृत्तसंस्था पीटीआयच्या वृत्तानुसार, आता कोरोना चाचणी अहवाल ब्रिटनला जाण्यापूर्वी 72 तासांपूर्वी दाखवावा लागेल. कोरोनाचा प्रादुर्भाव रोखण्यासाठी नवीन उपाययोजनांचा भाग म्हणून ब्रिटनने ही घोषणा केली.

प्रवाश्यांनी नवीन नियमांचे पालन केले नाही किंवा कोरोना चाचणी केली नाही तर त्याच्याकडून 500 पाऊंड पर्यंत दंड आकारला जाईल. कोरोनाची चाचणी केली नसेल तर प्रवाशांना ब्रिटनमध्ये येण्याची परवानगी दिली जाणार नाही. ब्रिटीश परिवहन मंत्री ग्रँट शॅप्स म्हणाले की कोरोनाला रोखण्यासाठी आम्ही यापूर्वी बरीच पावले उचलली आहेत, परंतु विषाणूचा नवा प्रकार आल्याने आता अतिरिक्त खबरदारी घ्यावी लागेल.

जपानकडून आपत्कालीन स्थिती घोषणा

दुसरीकडे, जपानने कोरोना संसर्ग रोखण्यासाठी आपत्कालीन स्थिती जाहीर केली आहे. पंतप्रधान योशिहिदे सुगा यांनी रेस्टॉरंट्समधील कामाचे तास कमी करण्यास सांगितले आणि लोकांना वर्क फ्रॉम होमचे पालन करण्याचे आवाहन केले. 'सद्याची परिस्थिती अतिशय गंभीरपणे घेतल्यास आपण या सर्व कठीण परिस्थितीतून मुक्त होऊ'. वृत्तसंस्था एपीच्या वृत्तानुसार ही आपत्कालीन परिस्थिती 7 फेब्रुवारीपर्यंत सुरू राहणार आहे.

ब्रिटनमध्ये दिवसाला 1,162 मृत्यू

यूकेमध्ये गुरुवारी गेल्या 24 तासात कोरोना संक्रमणामुळे 1,162 लोकांचा मृत्यू झाला, तर 52,618 नवीन रुग्णांची नोंद झाली. ब्रिटनमध्ये 1000 हून अधिक मृत्यूची नोंद सलग दुसर्‍या दिवशी झाली आहे. त्याचवेळी जपानचे पंतप्रधान सुगा म्हणाले की, देशाच्या प्रत्येक भागात संसर्ग होण्याच्या घटनांमध्ये लक्षणीय वाढ झाली आहे. जपानमध्ये आतापर्यंत कोविडच्या 2,60,000 रुग्णांची नोंद झाली आहे. शुक्रवारी मागील 24 तासांत कोरोनाचे 7,500 हून अधिक नवीन रुग्ण आढळले आहेत.

गुरुवारी 24 तासांत अमेरिकेत कोविड संसर्गामुळे चार हजाराहून अधिक लोकांचा मृत्यू झाला. एकाच दिवसात इतक्या मोठ्या संख्येने लोकांचा बळी गेल्याची ही पहिलीच वेळ आहे. यूएस सेंटर फॉर डिसीज कंट्रोल अँड प्रिव्हेंशनचा अंदाज आहे की जानेवारीअखेरीस मृतांची संख्या 4 लाख 5 हजार ते 4 लाख 38 हजार दरम्यान असेल. ब्राझीलमध्ये गेल्या चोवीस तासात 1524 लोकांचा मृत्यू झाला असून कोरोनामधील मृतांची संख्या दोन लाखांवर गेली आहे.