டெல்லியில் நடந்து வரும் இந்திய ஓபன் சூப்பர் சீரிஸ் பேட்மிண்டன் தொடரின் கால் இறுதி போட்டியில் சாய்னா நெவாலை வீழ்த்திய பி.வி.சிந்து அரை இறுதிக்கு தகுதி பெற்றார்.
இந்திய நட்சத்திர வீராங்கனைகளான பி.வி.சிந்து, சாய்னா நெவால் ஆகியோர் மோதினர்.முதல் செட்டில் சாய்னா 7-5 முன்னிலையில் இருந்தார். அதன் பின்னர் துடிப்பாக விளையாடிய சிந்து 11-9 முன்னிலை பெற்றார். தொடர்ந்து ஆதிக்கம் செலுத்திய சிந்து 17-12 என வலுவான நிலையை எட்டினார். இறுதியில் முதல் செட்டை 21-16 என கைப்பற்றினார் சிந்து.
2-வது செட்டில் சாய்னா தொடக்கத்திலேயே நெருக்கடி கொடுத்தார். இதனால் அவர் 6-3 என முன்னிலை பெற்றார். ஒரு கட்டத்தில் 14-10 என முன்னிலையில் இருந்த சாய்னா திடீரென சரிவை சந்தித்தார். சிந்து தனது ஆக்ரோஷ ஆட்டத்தால் 12-14 என நெருங்கி வந்தார். இதனால் சுதாரித்து விளையாடிய சாய்னா 19-16 என்ற அளவில் முன்னிலையை அடைந்தார்.
எனினும் அடுத்தடுத்த 2 புள்ளிகள் பெற்ற சிந்து 18-19 என நெருங்கினார். ஒரு கட்டத்தில் சாய்னா பெரிய தவறு செய்தார். அவர் சர்வ் செய்த பந்து நெட்டில் விழ ஆட்டம் 20-20 என சமநிலையை எட்டியது. இந்த நிலையில் ஆக்ரோஷமாக விளையாடிய சிந்து அடுத்தடுத்து இரு புள்ளிகள் சேர்க்க 2-வது செட்டை சிந்து 22-20 என கைப்பற்றினார். முடிவில் 21-16, 22-20 என்ற நேர் செட்டில் சிந்து வெற்றி பெற்றார். இந்த ஆட்டம் 47 நிமிடங்கள் நடைபெற்றது.
இந்த போட்டியை குறித்து சிந்து கூறுகையில், ஒட்டுமொத்தத்தில் இது சிறந்த ஆட்டமாக அமைந்தது. 2-வது செட்டில் சாய்னா 20-19 என்று முன்னிலை பெற்றிருந்த போது கூட நம்பிக்கையை இழக்கவில்லை. வெற்றி பெற முடியும் என்று உறுதியாக நம்பினேன். அதை செய்து காட்டினேன்’ என்றார்.
