Venkatesh : నాకంటూ లక్ష్యం ఏమీ ఉండదు.. భవిష్యత్తు కోసం చూడను: వెంకటేష్

Saindhav Promotions: వెంకటేష్ ని అభిమానించని వారు తెలుగు ఇండస్ట్రీలో ఉండరు అంటే అతిశయోక్తి కాదు. సినిమా హీరోల దగ్గర నుంచి సాధారణ ప్రేక్షకుల వరకు.. అందరూ వెంకటేష్ ని ఇష్టపడే వారే. అందుకు ముఖ్య కారణం ఆయన చేసే సినిమాలు అలానే బయట ఆయన ప్రవర్తించే తీరు…

Saindhav: ఫ్యామిలీ సినిమాలైనా.. క్లాస్ సినిమాలైనా.. మాస్ సినిమాలైనా.. ఏ సినిమా అయినా తనదైన స్టైల్ లో నటించి మెప్పించగలిగే హీరో వెంకటేష్. తెర పైనే కాదు తెర వెనుక కూడా ఆయన ప్రవర్తన అందరికీ నచ్చేలానే ఉంటుంది. అందుకే ఏ హీరో ఫ్యాన్ అయినా సరే వెంకటేష్ ని తమ అభిమాన హీరో లానే అభిమానిస్తారు తెలుగు ప్రేక్షకులు. కాగా ప్రస్తుతం వెంకటేష్ సైంధవ అనే చిత్రంలో నటిస్తున్నారు. ఈ సినిమా త్వరలో విడుదలకు సిద్ధమవుతూ ఉండగా ఈ చిత్ర ప్రమోషన్స్ ని ఈరోజు విజయవాడ కనకదుర్గమ్మ దగ్గర నుంచి మొదలుపెట్టారు ఈ చిత్ర యూనిట్.

ఈరోజు విజయవాడలో పర్యటించిన వెంకటేష్ మీడియాతో కూడా ముచ్చటించారు. ఇందులో భాగంగా ఆయన కొన్ని ఇంట్రెస్టింగ్ వ్యాఖ్యలు చేశారు. ఆయన మాట్లాడుతూ ‘నాకు ఫలానా పాత్రలు చేయాలనే లక్ష్యం కానీ, కోరిక కానీ ఉండదు. అవకాశం వచ్చినప్పుడు ఆయా పాత్రలు చేసుకుంటూ వెళ్లిపోతాను. అలానే లక్ష్యమంటూ ఏమీ ఉండదు.. భవిష్యత్తు కోసం నేను వేచి చూడను. ఒక మంచి అవకాశం వచ్చినప్పుడు దానికి 100 శాతం న్యాయం చేయడమే నా పని’ అని చెప్పుకొచ్చారు వెంకీ మామ.

ఇక ఇప్పటికే రెండు మూడు మల్టీ స్టార్స్ లో కనిపించిన వెంకటేష్ మళ్లీ అలా చేస్తారా అనే ప్రశ్న అడగగా.. ‘తప్పకుండా అందరూ హీరోలతో చేస్తాను.. అందరితో చేయడానికి నేను రెడీగా ఉన్నాను. పవన్‌తో చేస్తాను.. ప్రభాస్‌తో చేస్తాను.. అల్లుతో చేస్తాను.. జూనియర్‌తో చేస్తాను.. రానాతో చేస్తాను. దీని తర్వాత అన్నీ చేద్దాం. రానాతో చేస్తున్నాను కదా..రానా నాయుడు 2.. అయితే ఈ సిరీస్ లాస్ట్ టైమ్ అంత బోల్డ్‌గా ఉండదు. ఈసారి ఎక్కువ యాక్షన్, కామెడి ఉంటుంది. కొందరికి నచ్చనివి  తగ్గించేశాం. నేను అందరి అభిప్రాయాలను  గౌరవిస్తాను’ అని తెలియజేశారు.

కాగా ఈరోజు ఉదయం విజయవాడలో దిగిన హీరో వెంకటేష్, హీరోయిన్ శ్రద్ధా శ్రీనాథ్, బేబీ సారా, ఈ సినిమా దర్శకుడు శైలేష్ కొలను, నిర్మాత వెంకట్ బోయనపల్లి ముందుగా దుర్గమ్మ దర్శనం చేసుకున్నారు. ఆ తరువాత బాబాయ్ హోటల్‌లో టిఫిన్ చేశారు. అనంతరం ఈ సినిమా ప్రమోషన్స్ ని మొదలుపెట్టారు ఈ చిత్ర యూనిట్.

స్థానికం నుంచి అంతర్జాతీయం వరకు.. క్రీడలు, వినోదం, రాజకీయాలు, విద్య, ఉద్యోగాలు, హెల్త్, లైఫ్‌స్టైల్ .. A to Z అన్నిరకాల వార్తలను తెలుగులో పొందడం కోసం ఇప్పుడే Zee తెలుగు న్యూస్ యాప్ డౌన్‌లోడ్ చేసుకోండి.