Suryakumar Yadav IPL Runs: ఈ సీజన్‌లో ముంబై ఇండియన్స్ అద్భుతంగా పుంజుకుంది. మంగళవారం ముంబైలోని వాంఖడే స్టేడియంలో రాయల్ ఛాలెంజర్స్ బెంగుళూరుపై 6 వికెట్ల తేడాతో గెలుపొందింది. ఈ మ్యాచ్‌లో మొదట బ్యాటింగ్ చేసిన ఆర్‌సీబీ 20 ఓవర్లలో 6 వికెట్ల నష్టానికి 199 పరుగులు చేయగా.. అనంతరం ముంబై 4 వికెట్ట్ కోల్పోయి కేవలం 16.3 ఓవర్లలోనే భారీ లక్ష్యాన్ని ఛేదించింది. సూర్యకుమార్ యాదవ్ (83) అద్భుత ఇన్నింగ్స్‌కు తోడు నేహాల్ వధేరా (52), ఇషాన్ కిషన్ (42) ముంబై విజయంలో కీలక పాత్ర పోషించారు. ఈ మ్యాచ్‌లో పలు రికార్డులు నమోదయ్యాయి.
ఈ సీజన్‌లో సూపర్ ఫామ్‌లో ఉన్న విరాట్ కోహ్లీ.. ముంబైపై మ్యాచ్‌లో పూర్తిగా నిరాశపరిచాడు. జాసన్ బెహ్రెన్‌డార్ఫ్ వేసిన ఇన్నింగ్స్ మొదటి ఓవర్‌లో 4 బంతుల్లో కేవలం ఒక పరుగు చేసి పెవిలియన్‌కు చేరుకున్నాడు.
కెప్టెన్ ఫాఫ్‌ డుప్లెసిస్, గ్లెన్‌ మాక్స్‌వెల్ మరోసారి ఆర్‌సీబీని గట్టెక్కించారు. వీరిద్దరి దూకుడుతో 20 ఓవర్లలో 6 వికెట్ల నష్టానికి 199 పరుగులు చేసింది. డుప్లెసిస్ 65 పరుగులు చేయగా.. మాక్స్‌వెల్ 68 రన్స్ చేశాడు. చివర్లో దినేష్ కార్తీక్ 30 రన్స్‌తో దూకుడుగా ఆడాడు.
హిట్‌మ్యాన్ రోహిత్ శర్మ పేలవ ఫామ్ కంటిన్యూ అవుతోంది. అయితే మరో ఓపెనర్ ఇషాన్ కిషన్ తన ఫామ్‌ను కొనసాగించాడు. 21 బంతుల్లో 4 ఫోర్లు, 4 సిక్సర్ల సాయంతో 42 పరుగులు చేసి మంచి ఆరంభాన్ని ఇచ్చాడు.
నయా మిస్టర్ 360 సూర్యకుమార్ యాదవ్ మళ్లీ ఫామ్‌లోకి వచ్చాడు. వరుస అర్ధ సెంచరీలతో చెలరేగుతున్నాడు. బెంగుళూరుపై కేవలం 35 బంతుల్లో 83 పరుగులు చేసి ముంబైను గెలిపించాడు. ఈ క్రమంలో ఐపీఎల్‌లో 3 వేల పరుగులు కూడా పూర్తి చేశాడు. సూర్య 11 మ్యాచ్‌ల్లో 376 పరుగులతో ఆరెంజ్ క్యాప్ రేసులోకి వచ్చాడు.
ఒకే సీజన్‌లో 200 పరుగుల కంటే ఎక్కువ లక్ష్యాన్ని అత్యధికసార్లు ఛేదించిన జట్టుగా ముంబై ఇండియన్స్ నిలిచింది. ఈ సీజన్‌లో మూడుసార్లు 200 పరుగులకు పైగా లక్ష్యాన్ని ఛేజ్ చేశారు.
మరో 21 బంతులు ఉండగానే ముంబై ఇండియన్స్ విజయాన్ని అందుకుంది. 200+ పరుగుల ఛేజింగ్‌లో ఇదే అతిపెద్ద విజయం. కేవలం 16.3 ఓవర్లలోనే ముంబై జట్టు 200 పరుగుల టార్గెట్‌ను పూర్తిచేసింది.
