Petrol And Diesel Price Today: వాహనదారులకు గుడ్‌న్యూస్. ప్రపంచవ్యాప్తంగా చమురు ధరలు తక్కువగా ఉంటే.. పెట్రోల్, డీజిల్ ధరలు త్వరలో తగ్గించే అవకాశం కనిపిస్తోంది. ఈ విషయంపై పెట్రోలియం, సహజవాయువు మంత్రిత్వ శాఖ కార్యదర్శి పంకజ్ జైన్ హింట్ ఇచ్చారు. ప్రపంచవ్యాప్తంగా క్రూడ్ రేట్లు పొడిగించిన కాలం తగ్గితే.. ప్రభుత్వ-ఆధారిత ఇంధన కంపెనీలు ధరలను తగ్గించే ఆలోచనలో ఉన్నాయని చెప్పారు. ముడి చమురు ధరలు ఎక్కువ కాలం తక్కువగా ఉంటే.. చమురు కంపెనీలు ఇంధన ధరలను తగ్గించడాన్ని పరిశీలిస్తాయన్నారు.
ఇటీవల ఆయిల్ ధరలు దాదాపు మూడేళ్ల కనిష్టానికి పడిపోయాయి. దీంతో ఇంధన మార్కెటింగ్ కంపెనీల లాభదాయకతను పెంచడం, పంపు ధరల తగ్గింపునకు మార్గం సుగమం అయింది.
డిసెంబర్ 2021 తర్వాత మొదటిసారిగా మంగళవారం బ్రెంట్ క్రూడ్ బ్యారెల్‌ చమురు ధర 70 డాలర్ల దిగువకు పడిపోయింది.
క్రూడ్ ధరలు తగ్గడంతో చమురు ఉత్పత్తిని తగ్గించే యోచనలో ఒపెక్‌+ దేశాలు ఉండగా.. ఉత్పత్తి పెంచాలని భారత్ కోరుతోంది.
రష్యన్ ఆయిల్ తక్కువ ధరకే లభిస్తున్న తరుణంలో ఎక్కువగా దిగుమతి చేసేందుకు ఆయిల్ కంపెనీలు ప్లాన్ చేస్తున్నాయని పంకజ్ జైన్ తెలిపారు.
ఈ ఏడాది సార్వత్రిక ఎన్నికలకు ముందు మార్చి నెలలో పెట్రోల్, డీజిల్ ధరలను కేంద్రం తగ్గించింది. లీటర్‌కు 2 రూపాయలు తగ్గించింది.
త్వరలోనే జమ్ము-కశ్మీర్, హర్యానా, మహారాష్ట్ర అసెంబ్లీ ఎన్నికల నేపథ్యంలో పెట్రోల్, డీజిల్ ధరలు తగ్గించే అవకాశం ఉందని అంచనా వేస్తున్నారు.
ఫ్యూచర్స్ ట్రేడ్‌లో గురువారం ముడి చమురు ధరలు బ్యారెల్‌కు రూ.51 పెరిగి రూ.5,709కి చేరుకున్నాయి. మల్టీ కమోడిటీ ఎక్స్‌ఛేంజ్‌లో అక్టోబర్ డెలివరీకి ముడి చమురు 11,306 లాట్లలో బ్యారెల్‌కు రూ.51 లేదా 0.9 శాతం పెరిగి ₹ 5,709 వద్ద ట్రేడవుతోంది.
