અનંત-રાધિકાના લગ્ન; ગુજરાતના આ શહેરમાં 3 દિવસ ચાલશે પ્રી વેડિંગ સેલિબ્રેશન, ઈન્વિટેશન કાર્ડ Viral

Anant-Radhika Marriage: અબજોપતિ ઉદ્યોગપતિ મુકેશ અંબાણીના પરિવારમાં વર્ષ 2024 નવી ખુશીઓ લઈને આવશે. તેમના નાના લાડકા પુત્ર અનંત અંબાણી અને રાધિકા મર્ચન્ટ લગ્નના બંધનમાં બંધાવવા જઈ રહ્યા છે. હજુ જોકે અંબાણી પરિવાર તરફથી આ અંગે કોઈ અધિકૃત જાહેરાત થઈ નથી. પણ તાજેતરમાં આઈઆઈટી બોમ્બેમાં એક પ્રોગ્રામ દરમિયાન આકાશ અંબાણીએ એ સંકેત આપ્યો હતો કે 2024 પરિવાર માટે ખાસ રહેશે. કારણ કે આ વર્ષમાં અનંત અંબાણીના લગ્ન થવાના છે. જો કે આ દરમિયાન તેમણે લગ્નની તારીખ અંગે કોઈ જાણકારી આપી નહતી. 

માર્ચના પહેલા અઠવાડિયામાં શરૂ થશે પ્રી વેડિંગ સેરેમની
હવે જ્યારે અનંત અને રાધિકાના લગ્નનું કાર્ડ ઓનલાઈન સામે આવ્યું છે તો તમે તેને સાચું માની શકો. સેલિબ્રિટી ફોટોગ્રાફર વિરલ ભાયાણી તરફથી ઈન્સ્ટાગ્રામ પર શેર કરાયેલા આ  કાર્ડમાં જાણકારી આપવામાં આવી છે કે અનંત અને રાધિકાની પ્રી વેડિંગ સેરેમની માર્ચ 2024ના પહેલા અઠવાડિયામાં શરૂ થશે. કાર્ડની સાથે મુકેશ અંબાણી અને નીતા અંબાણી તરફથી હાથે લખાયેલી નોટ પણ છે. કાર્ડમાં અપાયેલી જાણકારી મુજબ તેમણે આ પ્રી વેડિંગ ફંક્શન માટે જામનગરની પસંદગી કરી છે. 

એન્ટીલિયામાં થઈ રાધિકા અને અનંતની સગાઈ
આ અગાઉ રાધિકા અને અનંત અંબાણીની સગાઈ એન્ટીલિયામાં થઈ હતી. તે વખતે ગુજરાતી પરંપરા મુજબ એન્ટીલિયામાં ગોળ ધાણા અને ચુંદડીની વિધિ કરવામાં આવી હતી. આ દરમિયાન અંબાણી પરિવાર તરફથી સરપ્રાઈઝ ડાન્સ પરફોર્મન્સ પણ આપવામાં આવ્યું હતું. જેના વીડિયો પણ સોશિયલ મીડિયામાં વાયરલ થયા હતા. બંનેની રોકા સેરેમની 29 ડિસેમ્બર 2022ના રોજ રાજસ્થાનના નાથદ્વારામાં શ્રીનાથજીના મંદિરમાં થઈ હતી. ત્યારબાદ અનંત અને રાધિકાએ ભગવાન શ્રીકૃષ્ણના આશીર્વાદ લીધા હતા અને ગણેશ પૂજન કર્યું હતું.