Rupee vs Dollar: ડોલર સામે રૂપિયામાં સૌથી મોટો ઘટાડો, વિદેશ જતા વિદ્યાર્થીઓ માટે મોંઘું થશે ભણતર

Rupee-Dollar Update: ડોલરની સરખામણીએ રૂપિયો બુધવારના પહેલી વખત 79 રુપિયાથી નેચે ગયો છે. કરેન્સી માર્કેટમાં આજના કારોબાર પૂર્ણ થવા પર રૂપિયામાં ઐતિહાસિક ઘટાડો જોવા મળ્યો અને એક ડોલર અનુસાર રૂપિયો પહેલી વખત 19 પૈસા ઘટાડા સાથે 79.04 રૂપિયા પર બંધ થયો છે.

રૂપિયો છેલ્લા 6 દિવસથી સતત રેકોર્ડ નીચલા સ્તરે બંધ થઈ રહ્યો છે. હકિકતમાં ક્રુડ ઓઇલના ભાવમાં વધારો, મોંઘવારીમાં વધારો અને વિદેશી રોકાણકોરોના વેચાણને કારણે રૂપિયામાં ઘટાડો જોવા મળી રહ્યો છે. ઇન્ટરબેંક કરેન્સી એક્સચેન્જ માર્કેટમાં રૂપિયો ડોલરની સરખામણીએ 78.86 પર ખુલ્યો હતો, પરંતુ ફરી 79.04 ના નીચલા સ્તરે બંધ થયો છે. આ વર્ષે રૂપિયો 5.8 ટકાથી વધારે નીચે ગયો છે. તમને જણાવી દઈએ કે, 23 ફેબ્રુઆરી 2022 ના યુદ્ધ શરૂ થયા પહેલા રૂપિયો ડોલરની સરખામણીએ 74.62 રૂપિયા પર હતો. જાણકારોનું માનીએ તો રૂપિયો ડોલરની સરખામણીએ 80 રૂપિયાના લેવલ સુધી જઈ શકે છે.

ખરેખરમાં વિદેશી રાકાણકારો મોટા પ્રમાણમાં વેચાણ કરી રહ્યા હોવાથી કરેન્સી માર્કેટમાં ડોલરની અછત વધી રહી છે. જ્યારે ડોલરની માંગ વધી છે. વિદેશી રોકાણકારોએ આ વર્ષે ભારતીય બજારમાં 28 અબજ ડોલરનું રોકાણ પાછું ખેંચ્યું છે. આરબીઆઇએ કહ્યું હતું કે, તેઓ તેમના રિઝર્વથી માંગને પૂર્ણ કરવાનો પ્રયત્ન કરી રહી છે.

ત્યારે અમેરિકા ફેડ રિઝર્વ જુલાઈમાં ફરીથી વ્યાજ દર વધારવાનો નિર્ણય લઇ શકે છે. આ ભયથી વિદેશી રોકાણકાર વેચાણ કરી પોતાના પૈસા પાછા ખેંચી રહ્યા છે. જેના કારણે ડોલરની સરખામણીએ રૂપિયામાં ઘટાડો થતા ભારતની મુશ્કેલીઓ વધી શકે છે. કેમ કે, ઇંધણથી લઇને ખાદ્યતેલ જેવી વસ્તુઓ મોંઘી થઈ શકે છે. તો બીજી તરફ ભારતમાથી વિદેશમાં અભ્યાસ કરવા જતા વિદ્યાર્થીઓ માટે ભણતર પણ મોંઘુ થઇ શકે છે.