1 રૂપિયાના સિક્કા લઈને શખ્સ પોતાનું ડ્રીમ બાઈક ખરીદવા પહોંચ્યો, ચિલ્લર ગણવામાં શો-રૂમને આંખે અંધારા આવી ગયા!

નવી દિલ્હીઃ ટીપે ટીપે સરોવર ભરાય અને ટીપે ટીપે ઘડો ભરાય એવી અનેક કહેવત તો તમે સાંભળી જ હશે, પરંતુ આજે અમે તેમને આ કહેવતને સાર્થક કરતો એક કિસ્સો જણાવવા જઈ રહ્યા છીએ. આવો જ એક કિસ્સો તામિલનાડુના સાલેમમાં પ્રકાશમાં આવ્યો છે જ્યાંના રહેવાસી વી બૂબાથીએ પાઈ-પાઈ ભેગી કરીને તેમની મનપસંદ બાઇક બજાજ ડોમિનાર 400 ખરીદી છે. અહીં પાઇ પાઈનો અમારો મતલબ બીજો કંઈ છે.

વાસ્તવમાં બૂબાથીએ 3 વર્ષ સુધી દરરોજ 1 રૂપિયાનો સિક્કો ભેગો કર્યો અને આ બાઇક ખરીદી, મજાની વાત ત્યારે શરૂ થઈ જ્યારે ડીલરશિપે તેના સિક્કા ગણવાનું શરૂ કર્યું. 1 રૂપિયાના એટલા બધા સિક્કા હતા કે ડીલરશિપને તેની ગણતરી કરવામાં 10 કલાકનો સમય લાગ્યો હતો. આ જાણકારી ઈન્ડિયા એજન્સીના મેનેજર મહાવિક્રાંતે આપી છે.

સિક્કાઓથી પુરુ કર્યું સપનું
બુબાથી બીસીએમાં ગ્રેજ્યુએટ કર્યું છે અને 4 વર્ષ પહેલા તેની યુટ્યુબ ચેનલ શરૂ કરતા પહેલા તે એક ખાનગી કંપનીમાં કોમ્પ્યુટર ઓપરેટર તરીકે કામ કરતો હતો. ત્રણ વર્ષ પહેલા તેણે બજાજ ડોમિનાર 400 ખરીદવાનું સપનું જોયું હતું, પરંતુ તે સમયે બાઇકની કિંમત 2 લાખ રૂપિયા હતી અને તેની પાસે એટલા પૈસા નહોતા. તેમણે પોતાની યુટ્યુબ ચેનલ દ્વારા મળેલી રકમમાંથી એક-એક રૂપિયાના સિક્કા ભેગા કરવાનું શરૂ કર્યું જેથી તે પોતાનું સપનું પૂરું કરી શકે. બુબાથીએ કહ્યું, "મેં લગભગ ત્રણ વર્ષથી દરરોજ મંદિરો, હોટેલો, ચાના સ્ટોલ પરથી નોટોના બદલામાં સિક્કા લીધા હતા."

કિંમત વધી જશે તેવી જાણકારી મારી પાસે નહોતી
તેમણે બાઈક ખરીદતા પહેલા જ તેને ખબર પડી કે બજાજ ડોમિનાર 400ની ઓન-રોડ કિંમત રૂ.2.6 લાખ સુધી પહોંચી રહી છે. ત્યારે તેમણે પોતાના જમા કરેલા સિક્કાઓ ગણવાનું શરૂ કર્યું અને સદભાગ્યે આ રકમ તેમના સપનાને પૂર્ણ કરવા માટે પૂરતી નીકળી. આ રકમ લઈને તે ભારત એજન્સીના મેનેજર મહાવિક્રાંત પાસે પહોંચ્યા હતા અને સિક્કામાં બાઇકની કિંમત ચૂકવવાનું કહ્યું હતું. શરૂઆતમાં મેનેજરે ઇનકાર કર્યો અને કહ્યું કે બેંક 2 હજાર રૂપિયાની નોટ પર 1 લાખ રૂપિયાની ગણતરી કરવા માટે 140 રૂપિયા કમિશન લે છે, પરંતુ બાદમાં બુબાથીનું સપનું પૂરું થતું જોઈને મંજૂરી આપી.