e-Shram Card: જો તમે ઈ-શ્રમ કાર્ડ બનાવવા માંગો છો, તો આ બાબતોનું ખાસ ધ્યાન રાખો, નહીં તો અરજી રદ થશે

e-Shram Card: દેશમાં મોટી સંખ્યામાં કામદારો અને મજૂરો છે, જેઓ અસંગઠિત ક્ષેત્રો સાથે સંકળાયેલા છે. આ કામદારોને તેમના જીવનમાં અનેક પ્રકારની આર્થિક સમસ્યાઓનો સામનો કરવો પડે છે. જેને ધ્યાનમાં રાખીને ભારત સરકારે ગયા વર્ષે ઈ-શ્રમ કાર્ડ રજૂ કર્યું હતું. છેલ્લા કેટલાક દિવસોમાં, દેશભરમાં મોટા પાયે અસંગઠિત ક્ષેત્ર સાથે સંકળાયેલા લોકો પોતાના ઈ-શ્રમ કાર્ડ બનાવી રહ્યા છે. ઘણા ઈ-શ્રમ કાર્ડ ધારકોના ખાતામાં સરકાર તરફથી સહાયની રકમ પણ આવવા લાગી છે. 

ઈ-શ્રમ કાર્ડ બનાવવાથી કામદારોને અનેક લાભ મળે છે. આ અંતર્ગત કામદારોને 2 લાખ રૂપિયાનો અકસ્માત વીમો પણ આપવામાં આવે છે. ઈ-શ્રમ કાર્ડ બનતાની સાથે જ કામદારોનો રેકોર્ડ સરકાર પાસે આવે છે. આવી સ્થિતિમાં, ભવિષ્યમાં તેમની રોજગાર મળવાની તકો નોંધપાત્ર રીતે વધી જાય છે. જો તમે પણ તમારુ ઈ-શ્રમ કાર્ડ બનાવવા જઈ રહ્યા છો, તો કેટલીક બાબતોનું ધ્યાન રાખવું જોઈએ, નહીં તો તમારી અરજી રદ થઈ શકે છે. ચાલો જાણીએ તે વસ્તુઓ વિશે, જેનું તમારે ખાસ ધ્યાન રાખવું જોઈએ.

ઈ-શ્રમ કાર્ડ યોજના ખાસ કરીને અસંગઠિત ક્ષેત્રના લોકો માટે બનાવવામાં આવી છે. સંગઠિત ક્ષેત્ર સાથે જોડાયેલા લોકો આ યોજનાનો લાભ લઈ શકતા નથી. જો તમે સંગઠિત ક્ષેત્રમાં આવો છો, તો તમારી અરજી નકારવામાં આવશે.

EPFO અને ESICના સભ્યો સંગઠિત ક્ષેત્રમાં આવે છે. જો તમારી પાસે PF એકાઉન્ટ છે અથવા તમે ESIC વગેરેને લગતી સેવાઓનો લાભ લઈ રહ્યા છો, તો તમારી અરજી નકારવામાં આવશે.

શ્રમ અને રોજગાર મંત્રાલયના જણાવ્યા અનુસાર, બાંધકામ કામદારો, સ્થળાંતર મજૂરો, શેરી વિક્રેતાઓ, ઘરેલું કામદારો, કૃષિ કામદારો અને અન્ય કોઈપણ કામદાર તેમનું ઈ-શ્રમ કાર્ડ બનાવી શકે છે, જે ESIC અને EPFO ના સભ્ય નથી.

અરજી કરતી વખતે ધ્યાનમાં રાખો કે તમારા દ્વારા આપવામાં આવેલી માહિતીમાં કોઈ ભૂલ નથી. આ ઉપરાંત, ફોર્મ ભરતી વખતે તમારા આધાર અને બેંકની વિગતોમાં કોઈ વિસંગતતા ન હોવી જોઈએ. અન્યથા વેબસાઇટ તમારી અરજી સ્વીકારશે નહીં.