ઘઉં બાદ હવે ખાંડના એક્સપોર્ટ પર પ્રતિબંધ? કેન્દ્ર સરકાર લઈ શકે છે મોટો નિર્ણય

નવી દિલ્હીઃ દેશમાં ખાંડના વધી રહેલા ભાવ પર નિયંત્રણ મેળવવા માટે કેન્દ્ર સરકાર મોટો નિર્ણય કરવાની તૈયારીમાં છે. ભારત દુનિયામાં ખાંડનું સૌથી વધુ ઉત્પાદન કરતો દેશ છે, જ્યારે ખાંડ એક્સપોર્ટ કરવાના મામલામાં ભારત બીજા નંબર છે. દુનિયામાં ખાંડની સૌથી વધુ એક્સપોર્ટ બ્રાઝિલ કરે છે. 

હવે ખાંડની નિકાસ પર પ્રતિબંધ લગાવશે સરકાર
દેશમાં ખાંડની વધી રહેલી કિંમતને કાબુમાં કરવા અને જનતાને રાહત આપવા માટે સરકાર ખાંડ એક્સપોર્ટ કરવાની લિમિટ નક્કી કરી શકે છે. કેન્દ્ર સરકાર આ સીઝનમાં ખાંડ એક્સપોર્ટ કરવાની લિમિટ 10 મિલિયન ટન સુધી સીમિત કરી શકે છે. છેલ્લા છ વર્ષમાં પ્રથમવાર કેન્દ્ર સરકાર ખાંડના એક્સપોર્ટ પર કોઈ પ્રતિબંધ લગાવી શકે છે. 

આ પણ વાંચોઃ શું તમારી પાસે પણ આધાર કાર્ડ છે? તો સરકાર આપશે પૂરા 5,500 રૂપિયાનો લાભ, જાણો કઈ રીતે

ઘઉંની નિકાસ પર સરકારે લીધો હતો નિર્ણય
મહત્વનું છે કે દેશમાં ઘઉંની વધતી કિંમત રોકવા માટે કેન્દ્ર સરકારે થોડા દિવસ પહેલા ઘઉંની નિકાસ પર પ્રતિબંધ લગાવી દીધો હતો. હવે જો સરકાર ખાંડની નિકાસ પર પ્રતિબંધ લગાવશે તો તેની અસર વૈશ્વિક માર્કેટ પર જોવા મળી શકે છે. 

દેશમાં ખાંડની કિંમતમાં થઈ રહ્યો છે વધારો
ઉપભોક્તા મંત્રાલયે આપેલી માહિતી પ્રમાણે દેશમાં 23 મેએ ખાંડની સરેરાશ કિંમત 41.58 રૂપિયા પ્રતિ કિલો હતી. તો વધુ મૂલ્ય 53 રૂપિયા કિલો અને ઓછી કિંમત 35 રૂપિયા પ્રતિ કિલો હતી.