#MeToo : હવે ફસાયો નવાઝુદ્દીન સિદ્દીકી, ભૂતપૂર્વ મિસ ઈન્ડિયાએ કહ્યું કે સવારે તેણે મારા ઘરે આવીને...

મુંબઇ : બોલિવૂડમાં ફરી એક એક્ટર પર યૌનશોષણનો આરોપ મૂકાયો છે. આ એક્ટર છે નવાઝુદ્દીન સિદ્દીકી. એક્ટ્રેસ અને પૂર્વ મોડેલ રહી ચૂકેલી નિહારિકા સિંહે આ આરોપ મૂક્યો છે. તેણે એક જર્નાલિસ્ટ સાથે આ વાત શેર કરી હતી જેણે ટ્વીટ કરી આ વાત સોશિયલ મીડિયા પર શેર કરી હતી. નિહારિકાએ જણાવ્યું કે તે ઈન્ડસ્ટ્રીમાં સ્ટ્રગલ કરી રહી હતી ત્યારે તેનું યૌનશોષણ થયું હતું. નિહારિકાએ પોતાની પોસ્ટમાં જણાવ્યું કે બોલિવૂડમાં સ્ટ્રગલ દરમિયાન સાજિદ ખાન અને ભૂષણ કુમારે ફિલ્મ ઓફર કરવાના બદલામાં ખોટી ડિમાન્ડ કરી હતી. સાથે જ નિહારિકાએ મયંક સિંહ સિંઘવી સાથે પોતાની સગાઈ તૂટવાની સ્ટોરી પણ શેર કરી હતી.

ભૂતપૂર્વ મિસ ઈન્ડિયા નિહારિકા સિંહે પોતાની લાંબી પોસ્ટમાં નવાઝુદ્દીન સિદ્દીકી, સાજિદ ખાન અને ભૂષણ કુમાર પર આરોપ લગાવ્યા છે. નવાઝ વિષે નિહારિકાએ જણાવ્યું કે, “નવાઝ આખી રાત શૂટ કરી રહ્યો હતો. સવારે તેણે મને મેસેજ કર્યો કે તે મારા ઘર પાસે જ છે તો મેં તેને નાસ્તા માટે ઈન્વાઈટ કર્યો. મેં ઘરનો દરવાજો ખોલ્યો ત્યારે તેણે મને જબરદસ્તી બાહુપાશમાં લઈ લીધી. મેં તેને હટાવવાની કોશિશ કરી પરંતુ થોડી જબરદસ્તી પછી મેં કોશિશ છોડી દીધી. હું તેની સાથે રિલેશનશીપમાં નહતી રહેવા માંગતી પણ તેણે મને કહ્યું કે તેનુ સપનું છે કે તેની પત્ની પણ પરેશ રાવલ કે મનોજ બાજપેયીની પત્નીની જેમ એક્ટ્રેસ કે મિસ ઈન્ડિયા હોય. મને નવાઝની આ વાત થોડી ફની પણ સારી લાગી.”

નિહારિકાએ પોતાની લાગણી વ્યક્ત કરતા જણાવ્યું કે, “મને થોડા મહિના પછી ખબર પડી કે નવાઝનું બીજી ઘણી મહિલાઓ સાથે અફેર છે. તેણે હલ્દ્વાનીમાં એક સ્ત્રી સાથે લગ્ન પણ કરી લીધા છે. નવાઝ પર દહેજ માંગવાનો આરોપ લગાવવામાં આવ્યો હતો. એક વાર તો એક સ્ત્રીએ મને ફોન કર્યો અને મારા પર બૂમબરાડા પણ કર્યા. ત્યાર બાદ મેં નવાઝ સાથે પોતાની રિલેશનશીપનો અંત આણી દેવાનું નક્કી કર્યું.”